Кіраўнік Беларусі даручыў Камітэту дзяржаўнай бяспекі разабрацца з распаўсюджвальнікамі фэйкаў пра смерці ад каронавіруса. Пра гэта паведамілі ў прэс-службе Аляксандра Лукашэнкі.
«Ужо хопіць на гэта глядзець. Трэба добра прайсціся па гэтых сайтах, каналах», – заявіў кіраўнік краіны.
Нагодай для такой заявы стала інфармацыя пра смерць жанчыны ў Віцебску. Паводле Лукашэнкі, «ніякага там каронавіруса» не было. Але, заявіў ён, «каб стварыць паніку», «раскруціць абстаноўку, падарваць нешта», «узялі, раскаталі, што загінула нібыта ад каронавіруса».
Кіраўнік Беларусі падкрэсліў, што неабходна разабрацца з «нягоднікамі, якія ўкідваюць гэтыя фэйкі».
Ён распавёў, што за апошнія содні ў Менску правялі каля 1000 тэстаў на каронавіруса, усе вынікі былі адмоўнымі.
20 сакавіка з’явілася інфармацыя, што 18 сакавіка ў Віцебску памерла 58-гадовая жанчына, якую шпіталізавалі з запаленнем лёгкіх. Паводле сваякоў, у яе быў станоўчы вынік на каронавіруса. Блізкія жанчыны таксама паведамілі, што тэсты ўзялі і ў іх, а саміх іх змясцілі на каранцін.
Між тым Міністэрства аховы здароўя зняпраўдзіла інфармацыю пра смерць ад каронавіруса. У ведамстве адзначылі, што ў жанчыны былі сур’ёзныя праблемы са здароўем – дыябет, артэрыяльная гіпертэнзія, хранічны бранхіт і падвышаная маса цела. Паколькі ёй пры паступленні быў выстаўлены дыягназ «пнеўманія», лекары ўзялі ў яе ды ейных сваякоў мазок на каронавірус. Але вынік у жанчыны быў адмоўны, вынікі сваякоў з’явяцца на наступным тыдні.
МГ belsat.eu
