Лукашэнка павіншаваў Украіну з Днём Незалежнасці. Вайну назваў «супярэчнасцямі» і пажадаў мірнага неба
24 жніўня Украіна святкуе Дзень Незалежнасці. Павіншаваць украінцаў пастанавіў і Аляксандр Лукашэнка, паведамляе ягоная прэс-служба.
«Перакананы, што сённяшнія супярэчнасці не змогуць разбурыць шматвяковага фундаменту шчырых добрасуседскіх зносінаў паміж народамі дзвюх краінаў, – гаворыцца ў віншаванні. – Беларусь і надалей працягне выступаць за захаванне згоды, развіццё сяброўскіх узаемапаважлівых кантактаў на ўсіх узроўнях».
Лукашэнка пажадаў украінцам мірнага неба, талерантнасці, мужнасці, моцы і поспехаў у аднаўленні годнага жыцця.
24 лютага сёлета Расея распачала поўнамаштабную вайну супраць Украіны. Для атакі была выкарыстаная таксама Беларусь, з тэрыторыі якой неаднаразова запускаліся ракеты, а таксама наступала расейская вайсковая тэхніка. Афіцыйны Менск адмаўляе ўдзел беларускай арміі ў вайне.
Марыя Міхалевіч belsat.eu
