Камітэт дзяржбяспекі Беларусі пракаментаваў нядаўнія звесткі аб тым, што былы вайсковец КДБ уцёк за мяжу. У ведамстве заяўляюць, што іх экс-супрацоўнік уцёк ад крымінальнага пераследу за махлярства, паведаміў прадстаўнік КДБ Андрэй Яраш.
Прадстаўнік КДБ Яраш заявіў, што інфармацыя аб уцёках вайскоўца КДБ за мяжу не адпавядае рэчаіснасці, але гаворка можа ісці пра былога вайскоўца.
Паведамляецца, што ён быў звольнены 9 жніўня гэтага года па дыскрэдытуючых падставах. Нібыта былы вайсковец у 2022 годзе здзейсніў шэраг ашуканскіх дзеянняў у дачыненні да грамадзян Рэспублікі Беларусь, у выніку чаго завалодаў грашовымі сродкамі на агульную суму звыш 30 тысяч долараў у эквіваленце.
На былога супрацоўніка КДБ распачалі крымінальную справу за махлярства па арт. 209 КК. Прадстаўнік ведамства Андрэй Яраш заявіў, што ён, «жадаючы ўхіліцца ад крымінальнага пераследу незаконна адбыў за межы Беларусі» і аб’яўлены ў вышук.
Раней «Наша Нiва» паведамляла, што капітан спецпадраздзялення КДБ «Альфа» збег за мяжу ў канцы верасня. Пасля гэтага ягоную групу паставілі «на каранцін» і адхілілі ад выканання заданняў – правяраюць і шукаюць іншых патэнцыйных «здраднікаў». Самога ж былога сілавіка цяпер правяраюць контртэрарыстычныя службы адной з сумежных дзяржаў. Яго імя, пасада, а таксама ўзровень ягоных допускаў да інфармацыі пакуль невядомыя.
Алена Рувіна belsat.eu
