47 грузавікоў з грузам у 300 тон лекаў, тэстаў на каронавірус, рэспіратараў, абарончых масак, шчыткоў, халатаў і апаратаў ШВЛ 5 чэрвеня перасеклі польска-беларускую мяжу ў кантрольна-прапускным пункце «Брузгі». «Белсат» таксама сустракаў.
У Горадню прыбыло 5 грузавікоў. Частка гуманітарнай дапамогі была пакінутая на гарадзенскай базе захоўвання медтэхнікі і потым будзе размеркавана паміж гарадзенскімі медычнымі ўстановамі.
У медычныя ўстановы Шчучына, Ліды і Смаргоні сёння таксама будзе дастаўленая гуманітарная дапамога з Польшчы.
Астатнія 42 грузавіка накіраваліся ў Менск. Пасля выгрузкі, гуманітарная дапамога будзе размеркаваная па ўсіх беларускіх медычных установах.
«Гэта ўжо другая партыя гуманітарнай дапамогі, якая накіроўваецца ў Беларусь. З беларусамі нас яднае не толькі агульная мяжа. Гэта і агульная гісторыя, суседства, якое на працягу стагоддзяў спрыяе развіццю стасункаў, рэалізацыі праектаў і ўмацаванню супрацы», – 4 чэрвеня падкрэсліў пры адпраўленні грузу з Варшавы дзяржаўны сакратар Канцылярыі прэм’ер-міністра Міхал Дворчык.
Гэта найбуйнейшая партыя гуманітарнай дапамогі ў гісторыі сучаснай Польшчы.
Яна будзе накіраваная для тых, хто мае найбольшую патрэбу. У Менску груз сустрэнуць прадстаўнікі Мінздароўя, МЗС і амбасады Польшчы.
Першая партыя гуманітарнай дапамогі Польшчы ў Беларусь адправілася 24 красавіка.
АК Belsat.eu