Магчымасць павышэння дапамогі па беспрацоўі, якая анансавалася ў краіне раней, пакуль не выключаецца, заявіла міністарка працы і сацыяльнай абароны Ірына Касцевіч, адказваючы сёння на пытанні журналістаў.
Яе міністэрства не здымае з парадку дня ўдасканаленне дапамогі беспрацоўным.
«Сёння сярэдні памер дапамогі – 27 рублёў. Мы разумеем, што гэта досыць маленькая велічыня. У 2019 годзе пры Палаце прадстаўнікоў будзе створана рабочая група па ўнясенні змяненняў у закон аб занятасці насельніцтва. Адзін з механізмаў, які будзе прапрацоўвацца, – дапамога па беспрацоўі.
Мы разумеем, што гэта дадатковыя выдаткі з бюджэту, але краіна сёння вызначыла два напрамкі палітыкі занятасці: актыўная і пасіўная. Дапаможнікі – гэта пасіўны механізм палітыкі занятасці, актыўны – гэта максімальна аказаць чалавеку садзейнічанне ў занятасці і і скараціць тэрмін пошуку працы», – цытуе Касцевіч БелТА.
Таксама міністарка заявіла, што некаторыя нормы абноўленага Дэкрэту №3 будуць перагледжаныя, перадае Радыё Свабода. У прыватнасці, гэта датычыць сітуацыі, калі беспрацоўныя грамадзяне, якія плацяць падаткі са сваіх даходаў, трапляюць у лік «дармаедаў».
«Мы бачым шмат нестандартных сітуацый, і трэба ўсё гэта ўважліва вывучыць і далей працягваць развіваць. Мы будзем уносіць змены ў гэты дакумент і не ставім у гэтай справе тлустай кропкі. Жыццё пакажа, што патрэбна выправіць, і мы гэта выправім», – сказала Касцевіч.
КА, belsat.eu