Каля 50 асобаў, затрыманых пасля Маршу недармаедаў у Менску, адбываюць арышты ў менскім ізалятары на Акрэсціна. Сюды ж штодня носяць для перадачы іхныя сваякі і сябры. Глядзіце стрым belsat.eu.
Марш недармаедаў адбыўся ў Менску 15 сакавіка. Цягам наступнага дня ў менскіх судах запрацаваў «канвеер»: затрыманым пасля і падчас акцыі прысуджалі арышты тэрмінам ад 3 да 15 содняў.
Цяпер большасць затрыманых 15 сакавіка ўтрымліваецца ў Цэнтры ізаляцыі правапарушальнікаў ГУУС Менгарвыканкама. Частка асуджаных на суткі – у ізалятары часовага ўтрымання, які знаходзіцца побач, але яны таксама замацаваныя за ЦІПам, – паведамляе праваабарончы Цэнтр «Вясна».
МЛ, belsat.eu