Лукашэнка ўзяўся за інфармацыйную бяспеку. Ён будзе «эфектыўна супрацьстаяць розным каналам і сайтам»
Кіраўнік Беларусі паабяцаў абмеркаваць праблему інфармацыйнай бяспекі ў кантэксце двухбаковых адносінаў з Расеяй на сустрэчы з Пуціным.
Лукашэнка бачыць вялікую пагрозу ў інфармацыйным ціску.
«… любая халодная ці тым больш гарачая вайна ніколі не пачынаецца без інфармацыйнага ціску і проціборства. Таму ў больш маштабным, сур’ёзным ключы мы гэтую праблему ўсебакова прааналізуем на найбліжэйшым пасяджэнні Рады бяспекі Беларусі», – заявіў кіраўнік дзяржавы.
Ён адзначыў, што «прапагандаваць асабліва не трэба». Трэба – «весці барацьбу за свае прынцыпы, падымаць імідж нашай краіны».
«І супрацьстаяць, асабліва ў СМІ, тым нападам, якія робяцца на Беларусь (а яны часам з розных бакоў робяцца), мы павінны ўмець. І нам трэба ў гэтым плане вызначыцца. Менавіта інфармацыйная бяспека ў кантэксце СМІ, асабліва інтэрнэту, – гэта асноўнае пытанне», – адзначыў Лукашэнка.
Лукашэнка падкрэсліў, што галоўнае ў проціборстве – эфектыўнасць.
«Эфектыўнасць у нас пакуль слабая, асабліва ў супрацьборстве з рознага роду каналамі, старонкамі ды сайтамі ў інтэрнэце. Вы бачыце, што сёння адбываецца. Мы слаба супрацьдзеем. Але адмыслоўцаў, прафесіяналаў у нас хоць каўшом бяры. Проста не было адпаведнай арганізацыі. Гэта трэба ўмець рабіць», – растлумачыў ён.
Шукаюць пагрозу не там, дзе трэба
У каментары belsat.eu старшыня БАЖ Андрэй Бастунец пракаментаваў ініцыятыву Лукашэнкі.
Паводле яго, галоўная небяспека ідзе з боку ўсходняга партнёра, але наўрад ці кіраўнік Беларусі будзе змагацца з прарасейскай прапагандай, якая праходзіць праз дзяржаўныя беларускія медыі.
«Прарасейская прапаганда – гэта галоўная небяспека. Таму я не ведаю, хто будзе ўспрымацца як пагроза. Ці будуць яны кантраляваць, каб да нас не ішла расейская пагроза. Або хутчэй будуць адсочваць сайты анархістаў, апазіцыйныя, «Белсат». І ўражанне, што хутчэй гаворка пра другое. Будуць мэтанакіравана адшукваць рэсурсы, якія крытыкуюць улады і ўзаемадзеянне з Расеяй».
Паводле Андрэя Бастунца, каб узмацніць інфармацыйную бяспеку, не трэба ствараць адмысловых арганізацыяў.
«Дастаткова пракантраляваць праграмы, якія ідуць па беларускіх каналах і транслююць прарасейскую прапаганду. А тут атрымліваецца наадварот. Нездарма я чуў, што ўлады ўспрымаюць «Белсат» не як СМІ, а як прапаганду. Калі іх еўрапейцы пытаюць, колькі можна штрафаваць журналістаў, якія супрацоўнічаюць з каналам, яны кажуць, што гэта не журналісты, а прапагандысты».
У часе сённяшняй нарады кіраўнік краіны заявіў, што раней не было неабходнасці ў стварэнні асобнай арганізацыі, якая займалася б пытаннямі інфармацыйнай бяспецы. Апроч таго, было заяўлена аб неабходнасці стварыць арганізацыю, якая давала бы рэйтынгі беларускім медыям.
ДР belsat.eu
