Кіраўнік Беларусі 14 лютага падчас наведвання Светлагорску распавёў падрабязнасці перамоваў з прэзідэнтам Расеі Уладзімірам Пуціным у Сочы. Пра гэта паведамілі ў прэс-службе кіраўніка краіны.
Лукашэнка адзначыў, што абмеркаваў з Пуціным «усё, пачынаючы з сівых часоў» – сярэдзіны ХХ стагоддзя. І толькі пасля бакі выйшлі на праблемы ў нафтавай сферы.
Паводле Лукашэнкі, у кіраўніцтве Расеі намякаюць на далучэнне Беларусі ў абмен на адзіныя кошты на энерганосьбіты. Але, заявіў ён, ні беларускі, ні расейскі народы ніколі не захочуць пайсці па гэтым шляху.
Кіраўнік Беларусі адзначыў, што падчас перамоваў у Сочы Уладзімір Пуцін засумняваўся, што беларускі бок працягне купляць нафту ў іншых краінах, бо яна «ўсё роўна даражэйшая за расейскую». Але Лукашэнка заявіў, што Беларусь працягне дыверсіфікаваць закупкі, каб «кожны год 31 снежня не стаяць на каленях».
«Памятаеце – ваш першы прэзідэнт, якога вы калісьці абралі, ніколі не стане апошнім. Ужо пасля мяне – думайце, як жыць. Але і калі я буду жыць, але не буду прэзідэнтам – я буду заўсёды змагацца, каб наша зямля заставалася суверэннай і незалежнай», – цытуе тэлеграм-канал «Пул Первого» кіраўніка краіны.
Паводле яго, пасля гэтай фразы на ЦКК загучалі апладысменты.
«Яны разумеюць інтэграцыю, як паглынанне Беларусі. Гэта не інтэграцыя! Гэта інкарпарацыя! На гэта я ніколі не пайду», – адзначыў Лукашэнка.
Галоўнымі тэмамі на перамовах у Сочы былі пытанні паставак у Беларусь газу і нафты. Сустрэча Лукашэнкі і Пуціна пачалася 7 лютага каля 13:00. На працягу дня кіраўнікі Беларусі і Расеі правялі перамовы як тэт-а-тэт, так і ў пашыраным складзе – з удзелам прадстаўнікоў урадаў дзвюх краін (а ў перапынку Пуцін і Лукашэнка паспелі пагуляць у хакей). Каля 22:00 пра вынікі перамоваў журналістам распавёў намеснік кіраўніка адміністрацыі прэзідэнта Расеі Дзмітрый Козак. Самі Пуцін і Лукашэнка заявы для прэсы рабіць не сталі.
МГ belsat.eu