На нарадзе па развіцці летніх відаў спорту кіраўнік Беларусі жорстка папярэдзіў Сяргея Кавальчука і старшыню Беларускай федэрацыі лёгкай атлетыкі Вадзіма Дзевяткоўскага не праваліць Еўрапейскія гульні, якія пройдуць улетку 2019 года.
«Народ стаміўся чакаць ад вас вынікаў. Калі будуць медалі?», – спытаў ён міністра спорту і турызму Сяргея Кавальчука.
«Аляксандр Рыгоравіч, II Еўрапейскія гульні стануць першым мерапрыемствам, дзе краіна ўбачыць годны вынік», – адказаў той.
Тады Лукашэнка перасцярог: «Давайце па-мужчынску. Крый божа, вы праваліцеся на Еўрапейскіх гульнях, вам у краіне няма месца. Ні вам, ні Дзевятоўскаму, ні астатнім».
ІІ Еўрапейскія гульні пройдуць у Беларусі з 21 па 30 чэрвеня 2019 года. Ужо цяпер спартовае свята беларускіх уладаў можа апынуцца пад пагрозаю байкоту. Пакуль што – толькі з боку Нямеччыны. Адна з прычыныў – ціск на незалежныя медыі, які асабліва ўзмацніўся апошнім часам. У межах гэтак званай справы БелТА затрымлівалі ў тым ліку і журналіста нямецкага выдання Deutsche welle Паўлюка Быкоўскага.
Між тым байкатаваць відовішчы, запланаваныя на чэрвень наступнага года, збіраюцца не толькі за мяжою. Беларусы таксама без імпэту ставяцца да імпрэзы.
ДР belsat.eu