Аляксандр Лукашэнка 5 чэрвеня падпісаў Указ № 215 «Аб спыненні палётаў авіямадэляў і беспілотных лятальных апаратаў». Пра гэта паведамляе ягоная прэс-служба. Цяпер, калі дрон заляціць у забароненую для палётаў зону, сілавікі могуць збіць яго з ужываннем зброі.
У адпаведнасці з дакументам, сілавікі «надзяляюцца паўнамоцтвамі на ўжыванне фізічнай сілы, спецыяльных сродкаў, зброі, баявой і спецыяльнай тэхнікі ў дачыненні да авіямадэляў і беспілотных лятальных апаратаў, што здзяйсняюць палёт у парушэнне ўсталяванага парадку».
«Гэтыя паўнамоцтвы дадзены для барацьбы з незаконным выкарыстаннем беспілотных апаратаў у забароненых зонах», – тлумачаць у прэс-службе Лукашэнкі.
Указ таксама прадугледжвае вызваленне сілавікоў ад абавязку па кампенсацыі ўласнікам дронаў шкоды за знішчэнне іх тэхнікі.
У цяперашні час у паветранай прасторы Беларусі зацверджаны зоны, забароненыя для палётаў дронаў. Гэта асобныя раёны Менску і буйных гарадоў, а таксама памежныя тэрыторыі.
ІІ belsat.eu
