Міністэрства аховы здароўя і дэпартамент турызму Міністэрства спорту і турызму на супольнай онлайн-канферэнцыі распавялі, як беларусы змогуць уязджаць у краіны Еўрапейскага Звязу. Пра гэта паведамілі ў Рэспубліканскім саюзе турыстычных арганізацыяў Беларусі.
Еўразвяз вызначыў пералік краін, грамадзяне якіх могуць наведваць яго з 1 чэрвеня. Беларусі ў гэтых спісах няма. Галоўная ўмова для краіны, адкуль могуць уязджаць грамадзяне ў краіны ЕЗ, – гэта колькасць тых, хто захварэў, якая не павінна перавышаць 25 чалавек на 100 000 жыхароў. У Беларусі гэты паказнік нашмат большы.
Тым не менш, паводле рэкамендацыі САЗ, краіны ЕЗ могуць прымаць грамадзянаў з краінаў з неспрыяльнай эпідэміялагічнай сітуацыяй пры наяўнасці ў замежніка даведкі аб адсутнасці інфікавання COVID-19.
Міністэрства аховы здароўя Беларусі распрацавала гэтыя даведкі на падставе рэкамендацыяў САЗ на расейскай і англійскай мовах і гатовае выдаваць іх пры неабходнасці.
Асноўнаю падставай для правядзення тэстаў і выдачы на падставе іх даведкі з’яўляецца аплачаны квіток туды і назад. Калі патрэбнае выкананне экспрэс-тэсту, то на заяву ахвочага выехаць за мяжу такая магчымасць будзе давацца.
Кошт такога тэсту для грамадзянаў Беларусі – Br 41, для нерэзідэнтаў – Br 56.
Пералік паліклінік, дзе можна будзе атрымаць даведку і здаць тэст, вызначаецца.
МГ belsat.eu
