«Імкнуўся выставіць раён у негатыўным святле». Суд Шаркаўшчынскага раёну аштрафаваў журналіста за супрацу з «Белсатам»


Фота belsat.eu

Суд Шаркаўшчынскага раёну пакараў 15 красавіка журналіста Змітра Лупача за супрацу з нашым тэлеканалам без акрэдытацыі штрафам у 892 рублі 50 капеек. Справу разглядала суддзя Аксана Табола. Матэрыял распавядаў пра нізкія заробкі ў раёне, якія яшчэ і затрымліваюцца.

У суд выклікалі дваіх сведкаў: людзей, якія былі героямі гэтага сюжэту: Віктара Крука і Мікалая Грышчанку. Яны ў судзе выказалі падтрыманне журналісту і былі здзіўленыя тым, што за дрэнную працу мясцовай улады караюць журналіста.

Як жыве сёння самы бедны раён краіны?

Зміцер Лупач звярнуў увагу суддзі на тое, што копія пратаколу не адпавядала арыгіналу, а таксама на тое, што ў рапарце было напісана, што ён здымаў з мэтай атрымання негатыўных ацэнак аб сацыяльна-эканамічнай сітуацыі ў раёне.

«Я не ставіў сабе такой мэты, – кажа Зміцер Лупач, – я проста здымаў матэрыял. А тое, што ў раёне такі сацыяльна-эканамічны стан, дык гэта ж не мая віна, гэта павінна быць у першую чаргу адказнасць прадстаўнікоў улады».

Гэта ўжо чацвёртая адміністрацыйная справа супраць Лупача ў гэтым годзе. 11 красавіка суд Глыбоцкага раёну па аналагічнай справе пакараў журналіста штрафам у памеры 1020 рублёў.

ДЛ belsat.eu

Глядзі таксама
Каментары