Ганна Канапацкая прапанавала развязаць пытанне з Саюзнаю дзяржаваю праз рэферэндум

Пра непатрэбнасць Саюзнай дзяржавы брацкім народам Беларусі і Расеі дэпутатка напісала ў «Facebook’у».

Ганна Канапацкая мяркуе, што гэты праект за 20 гадоў так і застаўся мёртванароджаным дзіцем, таму, магчыма, прыйшоў час паставіць у ім кропку праз рэферэндум.

Каментатары даволі рэзка адрэагавалі на прапанову дэпутаткі, узгадваючы шчыры падлік галасоў праз прыцягненне адміністрацыйнага рэсурсу.

«Я ведаю, што сумленных выбараў цяпер у нашай краіне няма і яны не адпавядаюць патрабаванням АБСЕ. Але ў дамове Саюзнай дзяржавы прапісана, што выхад з яе магчымы толькі праз рэферэндум. Таму гэта іншае пытанне. Я рыхтую змены ў выбарчае заканадаўства, але сёння стаіць пытанне пра тое, што Беларусі Саюзная дзяржава непатрэбная. І калі мы хочам скасаваць дамову, гэта адзіны шлях».

Дзень яднання Беларусі і Расеі адзначаецца 2 красавіка. Сталічныя ўлады адмовілі прарасейскай арганізацыі ў правядзенні пікету з гэтай нагоды. Ініцыятарам правядзення акцыі была Каардынацыйная рада левапатрыятычных сілаў Беларусі «Адзінства». Гэтая арганізацыя, у якую ўваходзяць нацыянал-бальшавікі, летась была ініцыятарам правядзення акцыі «Бессмертный полк».

ДР belsat.eu