[vc_row][vc_column][vc_video link=”https://www.youtube.com/watch?time_continue=6&v=9C4gHx-A28E”][vc_column_text]Другі дзень гэтак званай справы мясакамбінатараў. Справы маштабнай як паводле колькасці тамоў, гэтак і паводле стратаў ды пасадаў абвінавачаных. Разглядаюць справу ў Магілёве, але вінавацяць высокіх чыноўнікаў з Гомля. Горад на Сажом чарговы раз апынуўся ў цэнтры карупцыйнага скандалу.
96 тамоў крымінальнай справы, шасцёра фігурантаў, паўтары сотні сведкаў – крымінальная справа ўражвае сваёй маштабнасцю. Паводле следчых, у карупцыі замяшаныя адразу двое былых намеснікаў Гомельскага аблвыканкаму Віктар Трызна і Віктар Банчук. Апошні, дарэчы, не змешчаны пад варту, але ад каментароў „Белсату” адмовіўся.
Пасадоўцы мелі лабіяваць інтарэсы расейскай фірмы, якая купляла мясную прадукцыю з Беларусі без перадаплаты, а ў выніку не разлічылася цалкам за пастаўкі. У выніку – шматмільярдныя запазычанасці прадпрыемствам Гомельшчыны.
ЮРЫЙ ВАРОНЕЖЦАЎ
ПАЛІТЫК, НАВУКОВЕЦ
«Нашыя гомельскія чыноўнікі, напэўна, апынуліся такімі няўдачнікамі. Напэўна, насілі не ў тое месца і не тым людзям грошы, якія павінны былі выдзяляць у выглядзе распілу і крадзяжа.»
І сапраўды, вертыкальшчыкі Гомельшчыны на лаве падсудных не ўпершыню. Да прыкладу, летась да пяці гадоў зняволення асудзілі былога старшыню Гомельскага гарвыканкаму Віктара Піліпца. Пад следства трапіў і колішні намеснік Банчука Сяргей Якаўлеў, які замяніў яго на пасадзе старшыні райвыканкаму ў Рагачове.
Аляксандр Лукашэнка сёлета ў студзені пахваліўся перад журналістамі сур’ёзнай барацьбой з карупцыяй, але паспяшаўся дадаць:
“Яе цалкам перамагчы немагчыма. Вы не верце, што апазіцыянеры кажуць, быццам прэзідэнт гэта ўсё рэжысэруе”. – адзначаў кіраўнік дзяржавы.
У красавіку кіраўнік краіны распавёў пра выкрыццё карупцыйнай схемы на Ашмянскай мытні, а ўжо ў ліпені папісаў новы закон супраць карупцыі. Падавалася б, галоўны змагар з карупцыяй ў краіне зноў вяртаецца да старой праверанай схемы, з якой прыйшоў да ўлады. Але перад выбарамі антыкарупцыйная рыторыка знікла.
АЛЕГ ВОЛЧАК
БЫЛЫ СЛЕДЧЫ ПРАКУРАТУРЫ
Лукашэнку нявыгадна цяпер актыўна, галосна весці барацьбу з карупцыяй, таму што ён будзе паказваць, што сістэма не працуе. Што чыноўнікі ўсе карумпаваныя. І заўважце – нават гэты працэс закрыты.
Але пра гэткія паказальныя працэсы ў Гомлі ведаюць, а другі па велічыні горад Беларусі і ўвогуле называюць карупцыйнаю сталіцаю краіны. Таму дзе шукаць вінаватых у карупцыі, мы спыталіся ў гамельчукоў.
АПЫТАНКА
«Кіраўніцтва нашае. А хто ж яшчэ вінаваты?»
«Самі яны вінаватыя, што крадуць. Мала ім, напэўна.»
«Усё ад улады залежыць, так думаю.»
«Напэўна, кірўніцтва зверху гніе. Дзесьці ты бачыш пясчынку ў вачах, а ў сябе і бервяна не заўважаеш.»
У цяперашнім гучным працэсе, які ўжо паспелі акрэсліць як справу мяскамбінатараў вінавацяць таксама сына чыноўніка Віктара Трызны, былога дырэктара «Гомельскай мяса-малочнай кампаніі» Алега Чаркаса, а таксама дваіх грамадзянаў Расеі. Паводле следчых, яны мелі падмануць шэсць беларускіх прадпрыемстваў на 34 мільярды рублёў.
Ганна Любакова.[vc_row][vc_column][/vc_column][/vc_row]
