«Чарнобыльскі шлях – 2018»: стрым і спецвыданне на «Белсаце»

ВІДЭА

26 красавіка ў Менску прайшоў Чарнобыльскі шлях.

Спецыяльнае выданне “Студыі Белсат”

Фотарэпартаж Вячаслава Радзіміча з Чарнобыльскага шляху

20:31 Удзельнікі акцыі запальваюць знічы і ўскладаюць кветкі да крыжа і памятнага знаку.

«Зялёныя» выкідаюць корпус атамнага рэактару ў сметніцу

20:28. Павел Севярынец абвесціў канец акцыі. Удзельнікі спяваюць гімн «Магутны божа».

20:25. Павел Севярынец зачытаў рэзалюцыю ад імя ўдзельнікаў сёлетняга «Чарнобыльскага шляху», у якой між іншага змяшчаецца заклік спыніць будаўніцтва АЭС у Астраўцы. А таксама патрабаванне спыніць палітычныя рэпрэсіі і забяспечыць свабоду слова і стварэння грамадскіх арганізацыяў і палітычных партыяў.

20:20. Пасля чарговай прамовы людзі скандуюць «Не АЭС на Беларусі».

20:00. Побач з капліцай у Парку Дружбы народаў прамаўляе Аляксандр Кабанаў, які выступае супраць будоўлі акумулятарнага заводу пад Берасцем.

«Пачынаеш разумець, што Беларусь ператвараюць у краіну адкідаў», – кажа актывіст.

19:42. Экалагічны актывіст патлумачыў, чаму варта прыходзіць на акцыі супраць АЭС:

«Трэба паказваць, што не ўсё проста так згодныя на тое, што адбываецца. Ёсць людзі, якія супраць. Мы ведаем прыклады, прынамсі два, цалкам пабудаваных АЭС, але не загружаных палівам – гэта ў Балгарыі і ў Расеі. Іх зачынілі ў апошні момант, не загрузіўшы паліва».

19:27 Айцец Вікенцій з Беларускай аўтакефальнай царквы бярэ ўдзел у шэсці.

«Маскоўская царква робіць духоўны ўплыў на наш народ, каб яны адракліся ад сваёй зямлі, мовы, быццам ёсць толькі адна нейкая. Нашая краіна здаўна, з часоў Еўфрасінні Полацкай з’яўляецца хрысціянскай, у той час на месцы Расеі была арда», – адзначыў айцец Вікенцій.

«Чарнобыльскі шлях – 2018»

19:20 Да «Чарнобыльскага шляху» далучыліся жанчыны з руху «Маці 328» – маці маладых людзей, якія атрымалі доўгія турэмныя тэрміны паводле «наркатычных артыкулаў». Ад 27 красавіка яны абвяшчаюць бестэрміновую галадоўку, каб прыцягнуць увагу да сваёй праблемы. Галадаць будуць каля 20 асобаў.

19:14 Малады ўдзельнік акцыі акрэсліў тры вялікія праблемы, якія, на ягоную думку, ёсць у сённяшняй Беларусі: велізарныя завалы калійных адкідаў, асушаныя балоты і атамная станцыя, якая будуецца. Іншыя ўдзельнікі таксама звярнулі ўвагу на будову акумулятарнага заводу ў Берасці.

«Чарнобыльскі шлях – 2018»

19:03 Шэсце амаль дайшло да плошчы Бангалор. Людзі крычаць «Жыве Беларусь».

«Чарнобыльскі шлях – 2018»

18:59 Вядомая актывістка Ніна Багінская таксама прыйшла на акцыю.

«Самае асноўнае – трэба бараніць сваю нацыю. А ў нас Чарнобыль загадзіў нашую зямлю. Гэта была сусветная катастрофа, мы – ахвяры», – заявіла яна і дадала, што ў нас пачаўся і «духоўны Чарнобыль», маючы на ўвазе русіфікацыю, якая не была настолькі заўважная «нават пры Савецкім Саюзе».

18:51 Удзельнік акцыі, калі пачуў пра заявы ўладаў наконт «бяспекі на Астравецкай АЭС» адрэагаваў коратка: «Не веру я ў гэта».

«Чарнобыльскі шлях – 2018»

18:32 Калона пачала рух.

«Чарнобыльскі шлях – 2018»

18:30 Павел Севярынец прыйшоў на акцыю.

«Чарнобыльскім шляхам пачнецца Астравецкі. Мы лічым, што Астравецкая АЭС – расейская ядравая бомба, нам не патрэбны другі Чарнобыль, і таму мы праводзім «Астравецкі шлях» усю другую палову году», – заявіў палітык.

«Чарнобыльскі шлях – 2018»

18:18 Заяўку на «Чарнобыльскі шлях» падавалі сем палітычных партыяў і грамадскіх рухаў. Сярод іх Беларуская хрысціянская дэмакратыя, прадстаўнік якой Віталь Рымашэўскі адзначыў:

«Гэты «Чарнобыльскі шлях» адрозніваецца тым, што будуць падзеі ў рэгіёнах. 26-га – першае з шэрагу мерапрыемстваў, якія пройдуць. Наступныя запланаваныя ў Заслаўі, Маладзечне і да Астраўца – каб прыцягнуць увагу грамадства да наступнай магчымай атамнай катастрофы».

«Чарнобыльскі шлях – 2018»

Андрэй Ажароўскі – расейскі антыядравы актывіст

«У Расеі вялікія карпарацыі робяць вялікія намаганні, каб як мага больш людзей не ўзгадвалі пра Чарнобыль. Беларусы ў гэтым больш смелыя людзі. У нас Чарнобыль – гэта больш пра мінулае і менш пра сучаснае, таму што дзяржаўная карпарацыя «Расатам» кіруе баль. У нас у краіне 11 рэактараў «чарнобыльскага тыпу» і яны працуюць, іх ніхто не адключыў. Лукашэнка не вывучыў урокі мінулага. Гэта сумна, што ўлады прымаюць рашэнні не параіўшыся»

«Чарнобыльскі шлях – 2018»

Андрэй Ажароўскі таксама мяркуе, што, калі трагедыя паўтарыцца, то зноў грамадства аператыўна нічога не даведаецца:

«Я не веру ані ўладам Беларусі, ані ўладам Расеі. Мы ведаем як яны сябе паводзяць. Вось быў жа інцыдэнт з рэактарам, які ўранілі. Павінныя былі адразу сказаць, паказаць сваю сумленнасць, тады, можа быць, да іх было б больш даверу. Але яны даказалі, што яны будуць хлусіць і хаваць усё максімальна».

Акрамя пытання бяспекі Ажароўскі таксама ўзняў эканамічны бок праблемы БелАЭС:

«Што там сказаў чалавек, які называе сябе прэзідэнтам? Што ён не ў курсе, як можна гэты аб’ект убудаваць у эканоміку краіны! Мы яго папярэджвалі! Мы рабілі экалагічную экспертызу, мы казалі, што гэта ў эканоміку не ўваходзіць!»

18:15 Удзельнікаў ужо каля 200.

18:10 Актывісты-«працаўнікі» зладзілі перформанс: прынеслі макет рэактару, які ўранілі. На пытанні, што адбываецца, кажуць: «Усё ў парадку». На макеце рэактару надпіс «Невиноватые мы, он сам упал».

«Чарнобыльскі шлях – 2018»

18:05 На акцыю прыйшла экалагічная актывістка Таццяна Новікава. У каментары «Белсату» яна заявіла:

«32 гады – нікчэмна малы тэрмін. Яны яшчэ не мінулі, а ўжо год застаўся да пуска новай Астравецкай АЭС, якая будуецца з парушэннямі, з грэбаваннем да стандартаў бяспекі, дзе адбываюцца інцыдэнты. У беларусаў не запыталіся, ці хочуць яны гэтую АЭС. Таму сёння важна памятаць пра гэта і важна нагадваць, бо ў чалавека вельмі кароткая памяць».

18:00 На акцыю пачалі падыходзіць першыя ўдзельнікі. Яны трымаюць нацыянальную сімволіку і ікону «Маці Божую ахвяраў Чарнобылю». Іншыя актывісты выстраіліся уздоўж праспекту з партрэтамі палітычных зняволеных. Гэтая кропка не ўваходзіць у сагласаванае месца.

17:00 Cапёры з сабакамі абшукваюць кусты перад Акадэміяй Навук. Праз гадзіну там мусіць пачацца Чарнобыльскі Шлях.

Фота: Ірына Арахоўская

 

Удзельнікі Чарнобыльскага шляху збяруцца а 18:00 каля кінатэатру «Кастрычнік». А 18:30 пачнецца шэсце па маршруце праспект Незалежнасці – Сурганава – Арлоўская да памятнага знаку «Ахвярам Чарнобыля». Паміж 20:00-20:30 тут пройдзе малітва-мітынг. Наш канал правядзе стрым з акцыі:

Адначасова а 18-й у эфір тэлебачання выйдзе спецвыданне Студыі «Белсату».

«Чарнобыльскі шлях» – традыцыйная вулічная акцыя, якую штогод 26 красавіка праводзіць апазіцыя. Першая акцыя адбылася ў 1988 годзе.

ІІ, belsat.eu

Глядзі таксама
Каментары