Чалец прэзідыуму Каардынацыйнай рады юрыст Максім Знак затрыманы. Сувязь з ім знікла ў 8:30 па беларускім часе.
«А 8:30 у Максіма павінна было быць інтэрвʼю, ён не зайшоў у Zoom, я яму патэлефанаваў ён вымавіў фразу: «Падобна, хтосьці да нас прыйшоў», адключыўся і напісаў слова «Маскі», – распавёў kyky.org прадстаўнік штабу Віктара Бабарыкі Глеб Герман.
Пазней Глеб Герман пацвердзіў belsat.eu затрыманне Максіма Знака.
11:00 – у штабе Віктара Бабарыкі працягваюць працаваць сілавікі.
У кватэры юрыста штабу Бабарыкі Іллі Салея ператрус. Туды прыехаў ягоны бацька. Каля дому стаіць сярэбраны Мерседэс з супрацоўнікамі ў цывільным.
Таксама праходзіць вобшук у кватэрах Марыі Калеснікавай і Максіма Знака.
На дадзены момант на свабодзе ў Беларусі застаецца толькі адзін сябра прэзідыума Каардынацыйнай Рады – Святлана Алексіевіч.
Ад 7 верасня дакладна не вядома дзе знаходзіцца Марыя Калеснікава.
Антон Раднянкоў – прэс-сакратар Каардынацыйнай рады Беларусі, Іван Краўцоў – выканаўчы сакратар утварэння 8 верасня былі вымушаныя зʼехаць у Кіеў.
Павел Латушка, Вольга Кавалькова і Святлана Ціханоўская цяпер знаходзяцца ў Варшаве.
