Брытанскія дэпутаты ізноў адхілілі ўгоду з Еўразвязам пра ўмовы Brexit. Падчас галасавання, якое адбылося 12 сакавіка ў Палаце абшчын, 391 дэпутат адхіліў праект пагаднення, унесены ў ніжнюю палату парламенту прэм’ер-міністрам Тэрысай Мэй, падтрымалі яго 242 дэпутата. У студзені перавага праціўнікаў угоды склала 230 галасоў.
Такім чынам, усяго за 17 дзён да даты афіцыйнага выхаду з Еўразвязу, у Лондану і Бруселю да гэтага часу няма дакладна абумоўленых умоў Brexit. Раней Мэй паабяцала, што ў выпадку, калі дэпутаты адкінуць угоду, што і адбылося, то ўжо 13 сакавіка яны змогуць прагаласаваць па пытанні аб магчымасці выхаду краіны з ЕЗ без угоды з Бруселем.
«Два тыдні таму, стоячы на гэтым жа самым месцы, я зрабіла некалькі абяцанняў, якія датычыліся таго, якія захады будуць зроблены ў тым выпадку, калі палата не прыме прапанаваную здзелку. Я маю намер цалкам прытрымлівацца зробленых абяцанняў. Мы разгледзім прапанову правесці 13 сакавіка галасаванне па пытанні, ці падтрымае палата выхад з ЕЗ без угоды 29 сакавіка», – сказала Тэрыса Мэй.
У тым выпадку, калі дэпутаты выступяць і супраць такога сцэнару, то 14 сакавіка яны змогуць прагаласаваць за тое, каб перанесці дату выхаду Вялікай Брытаніі з Еўразвязу з 29 сакавіка на больш позні тэрмін.
СК, belsat.eu
