Больш за 800 дзеячоў культуры і мастацтва Беларусі падпісаліся пад адкрытым лістом з патрабаваннем спыніць беззаконне і рэпрэсіі, якія ахапілі ўсю краіну і дабраліся да сферы культуры.
Прадстаўнікі сферы культуры заклапочаныя сітуацыяй у Беларусі і перакананыя, што існы крызіс патрабуе неадкладнага законнага вырашэння, інакш наступствы прававога дэфолту адкінуць нашу краіну назад у развіцці і створаць глебу для самавольства і беззаконня. Адзіным выйсцем ў гэтай сітуацыі з’яўляецца тэрміновае правядзенне паўторных выбараў у адпаведнасці з усімі міжнароднымі стандартамі.
«Мастакі, музыканты, акторы, пісьменнікі, паэты, архітэктары, дызайнеры, фатографы, выдаўцы, стылісты, прадусары, прамоўтэры, навукоўцы і даследчыкі культуры, культурныя актывісты, кіраўнікі творчых аб’яднанняў і калектываў, студэнты і выкладчыкі творчых спецыяльнасцей ВНУ — мы ўсе надзвычай абураныя і катэгарычна асуджаем недапушчальныя ў цывілізаванай дзяржаве факты парушэння закона Рэспублікі Беларусь, неабгрунтавана жорсткі гвалт над мірнымі грамадзянамі з боку сілавых структур і фальсіфікацыю вынікаў выбараў прэзідэнта Рэспублікі Беларусь», – гаворыцца ў адкрытым лісце.
Падпісанты ліста звяртаюць увагу, што працаўнікоў культуры звальняюць, уносяць імёны ў чорныя спісы непажаданых артыстаў, наўпрост аказваюць ціск, запалохваюць, саджаюць у турмы. Многія дзеячы культуры апынуліся за кратамі.
Прадстаўнікі сферы культуры патрабуюць прызнаць выбары 9 жніўня несапраўднымі. Таму лічаць, што неабходна правесці паўторныя выбары, але ў адпаведнасці з міжнароднымі стандартамі і пры ўмове адстаўкі існага складу ЦВК з прыцягеннем іх да адказнасці. Акрамя таго, падпісанты ліста патрабуюць спынення гвалту, ціску і рэпрэсіяў, аднаўлення на працы ўсіх звольненых працаўнікоў сферы культуры.
У спісе патрабаванняў і іншыя пункты:
«Вызваліць і рэабілітаваць усіх палітычных зняволеных, а таксама ўсіх грамадзянаў, затрыманых падчас мірных акцыяў, незаконна аднесеных да праяваў супрацьпраўнай дзейнасці.
Спыніць супрацьпраўную дзейнасць працаўнікоў сілавых органаў і правесці праверкі законнасці іх дзеянняў, пачынаючы з моманту збору подпісаў для вылучэння ў кандыдаты ў прэзідэнты Рэспублікі Беларусь.
Распачаць справу па факце збіцця і зверскіх здзекаў з грамадзянаў, затрыманых падчас мірных дэманстрацыяў. Прыцягнуць да адказнасці кіраўнікоў сілавых структураў, адказных за гвалт, расправы і пагрозы, за ўмяшальніцтва ў прыватнае жыццё грамадзянаў.
Аказаць паўнавартасную медычную, псіхалагічную, прававую і матэрыяльную дапамогу ўсім пацярпелым ад неправамерных захадаў прадстаўнікоў сілавых структур.
Неадкладна пачаць адкрыты грамадскі дыялог улады з прадстаўнікамі народа на прадмет правядзення сумленных, празрыстых і справядлівых выбараў у Рэспубліцы Беларусь з наступнай перадачай прэзідэнцкіх і ўладных паўнамоцтваў законна абранаму кіраўніку дзяржавы».
Падпісанты адкрытага ліста папярэджваюць, што калі іх не пачуюць, то яны адмовяцца ад прадстаўлення нацыянальных інтарэсаў краіны або адмовяцца ад арганізацыі міжнародных і нацыянальных культурных мерапрыемстваў.
СК belsat.eu
