З 1 студзеня наступнага года беларусаў чакае чарговае падаражэнне жыллёва-камунальных паслуг. Праўда, абяцаюць улады, плацяжы вырастуць не больш чым на 5 долараў у эквіваленце. Адпаведны праект дакументу плануецца падрыхтаваць да сярэдзіны лістапада.
Па выніках 2018 года беларусы мусяць узяць на сябе 76,3 % выдаткаў жыллёва-камунальных службаў. Пра тое, што беларусы павінны плаціць за паслугі па сабекоштах, чыноўнікі сцвярджаюць не першы раз. Гэтак, у 2016 годзе казалі, што стоадсоткавая аплата камунальных будзе з 2018 года. Потым удакладнілі: акрамя ацяплення і гарачай вады. Цяпер планы дзяржава перанесла на 2020 год.
Тарыфы ж на ЖКГ растуць. Сёння беларусы, перадусім жыхары Менску, пакрываюць 100 % выдаткаў на каналізацыю, вываз смецця, асвятленне пад’езду, электрычнасць для працы ліфта і ўборку пад’езду. А вось за ацяпленне і гарачую ваду насельніцтва плоціць толькі 20 % ад сапраўдных коштаў.
Што цікава, раней беларусы ўжо аплочвалі цалкам і электраэнергію (нават пераплочвалі), і практычна цалкам ацяпленне, але пасля сітуацыя змянілася. Гэтак, у далёкім 2003-м грамадзяне краіны пакрывалі 107 % выдаткаў на электраэнергію і 98 % за ацяпленне.
Паводле словаў дырэктара ўстановы «Эфектыўнае кіраванне будынкамі» Уладзіміра Навасяда, у беларусаў сапраўды ёсць досвед стоадсоткавай аплаты камунальных паслуг. Але раней гаворка ішла не пра тарыфы, а пра сабекошт той ці іншай паслугі камунальнай гаспадаркі. Цяперашняя сістэма тарыфікацыі камунальных паслуг, паводле суразмоўцы, падобная да карупцыі.
«Манаполія аказвае паслугу, кантралюе яе якасць і сама ж на пачатку года вызначае тарыф. То бок кошт гігакалорыяў і кілават-гадзін. А розніцу яна забірае з бюджэту па выніках года. Атрымліваецца, што чым горш яна спрацуе, тым больш яна атрымае датацыяў. І крытэр ацэнкі гэтай паслугі – тарыф. У краінах, дзе адбылася трансфармацыя ЖКГ, сышлі ад тарыфаў і прыйшлі да сабекошту гігакалорыяў і кілават-гадзін – роўна да таго, колькі пэўная паслуга каштуе без нейкіх датацыяў і тарыфаў. У гэтым і ёсць выйсце», – зазначыў Уладзімір Навасяд.
На думку адмыслоўца, пакуль у Беларусі будзе існаваць тарыфікацыя, ведамствы і дзяржаўныя манаполіі будуць зацікаўленыя ў тым, каб грамадзяне не аплочвалі 100 % той ці іншай паслугі, бо «тым самым яны пазбавяцца манапольнага права атрымліваць прыбытак з выдаткаў».
Патрэбу перавесці насельніцтва на стоадсоткавую аплату камунальнага сэрвісу ўлады Беларусі тлумачылі ўмовамі для атрымання крэдыту ад Міжнароднага валютнага фонду. Праўда, як заявіў Лукашэнка, такі пункт з’явіўся «нават не з падачы МВФ», а «з падачы дзеячаў ва ўрадзе». А рэзкі рост выдаткаў на камунальныя паслугі, паводле яго, мог прывесці да грамадскіх хваляванняў. У выніку Беларусь прыпыніла перамовы пра крэдыт. Але прыпыніць – не значыць адмяніць. Аднавіць перамовы запланавалі праз два гады – у 2020-м. На гэты год якраз прызначанае чарговае павышэнне тарыфаў.
Разам з тым, МВФ не патрабаваў ад Менску стоадсоткавай аплаты тарыфаў, а толькі казаў пра неабходнасць «прыняць і рашуча рэалізаваць смелую праграму рэформаў з добра спланаванаю паслядоўнасцю дзеянняў, якія ўлучаюць у сябе лібералізацыю цэнаў, захады для вываду тарыфаў на паслугі прадпрыемстваў камунальнай гаспадаркі і транспарту на ўзровень поўнага пакрыцця выдаткаў».
Як падкрэсліў Уладзімір Навасяд, МВФ замест стоадсоткавай аплаты ў межах існай сістэмы прапаноўвае рэфармаваць сістэму надавання камунальных паслуг насельніцтву.
«Гаворка ідзе пра тое, што неабходна зрабіць раздрабленне дзяржаўных манаполіяў, правесці аграмадную працу сярод манапалістаў. І ўжо потым, пасля пераходу да сабекошту той ці іншай паслугі, і будзе стоадсоткавая аплата», – заявіў суразмоўца. Ён таксама дадаў, што гэтыя 100 % могуць нават быць меншыя за тыя грошы, што цяпер плоцяць беларусы.
Адмысловец таксама назваў варыянты таго, як ужо сёння можна часткова развязаць пытанне аплаты камунальных паслуг, у межах дзейнага заканадаўства. У прыватнасці, гаворка ідзе пра масавае стварэнне таварыстваў уласнікаў. І каб неасноўныя паслугі таварыствы атрымлівалі ад прыватных установаў. То бок, гаворка ідзе пра клірынг, інжынірынг і шэраг іншых працаў, якія звязаныя з абслугоўваннем і эксплуатацыяй аб’екту.
Але да канца гэты механізм у Беларусі не задзейнічаны. Бо ў краіне толькі 16 % дамоў стварылі таварыствы ўласнікаў або жыллёва-будаўнічыя спажывецкія кааператывы.
«Толькі сам уласнік жытла, самі жыхары ў гэтых дамах зацікаўленыя ў рэформе гэтага сектару эканомікі. І апроч іх гэту праблему ніхто не ў стане цяпер развязаць», – падкрэсліў Уладзімір Навасяд.
МГ