Міністэрства эканамічнага развіцця Расеі апублікавала справаздачу, дзе падлічылі знятыя за 2018 год гандлёвыя абмежаванні з боку іншых краінаў.
Праз тое, што былі знятыя 32 абмежаванні або пагрозы абмежавання, Расея захавала 330 млн долараў.
Паводле дакументу, цягам мінулага году была зраўняная стаўка падатку на даданую вартасць на тавары з Беларусі і Еўразійскага эканамічнага саюзу, а таксама адмененая працэдура дзяржаўнай санітарна-гігіенічнай экспертызы (акрамя прадукцыі, якая належыць дзяржаўнай рэгістрацыі).
Усяго Беларусь ужыла супраць РФ 13 абмежавальных захадаў (іхная сутнасць не ўдакладняецца ў дакуменце) і апынулася на 4 месцы пасля краінаў ЕЗ, Украіны ды Індыі.
Разам з тым, сцвярджаюць у расейскім міністэрстве, беларускія абмежаванні не моцна нашкодзілі Расеі. Дзеля параўнання прыводзяць лічбу ў 2, 4 млрд долараў – менавіта столькі губляе расейская эканоміка ў выніку еўрапейскіх санкцыяў.
КА, belsat.eu
