29 сакавіка аператара «Белсату» затрымалі ў Маскве падчас здымак каля будынку заводу ААТ «Канкорд», які кантралюе бізнесмен Яўген Прыгожын, вядомы як «повар Пуціна».
Аператара Максіма Гараніна затрымала ў Маскве служба бяспекі заводу ААТ «Канкорд», калі наш калега здымаў прадпрыемства звонку.
«Ахоўнікі дзейнічалі па-за тэрыторыяй заводу», – распавёў Максім па тэлефоне.
Ахоўнікі адабралі ў аператара рэдакцыйную камеру і штатыў, якія вярнуць назад Максіму ўдалося дзякуючы ўмяшанню мінака.
Максім выклікаў паліцыю. Тое самае зрабілі ахоўнікі. На момант публікацыі яны не адпускаюць рэпарцёра.
У расейскім Цэнтры абароны правоў медыяў «Белсату» заявілі, што ахоўнікі парушылі адразу некалькі законаў.
«Яны парушылі артыкул 144 Закону РФ аб СМІ (перашкода законнай прафесійнай дзейнасці журналіста), – кажа юрыстка Цэнтру Святлана Кузяванава. – Супрацоўнікі прыватнага ахоўнага прадпрыемства не могуць абмяжоўваць свабоду людзей – гэта ў чыстым выглядзе самаўпраўства. Канфіскаваўшы тэхніку, ахоўнікі падверглі рызыцы разгалошванне інфармацыі пра крыніцы, якая можа ўтрымлівацца на носьбітах камеры. Згодна з артыкулам 41 Закона аб СМІ, журналіст абавязаны захоўваць яе канфідэнцыйнасць».
«Канкорд», кантраляваны вядомым рэстаратарам Яўгенам Прыгожыным, апынуўся ў цэнтры ўвагі медыяў пасля эпідэміі шыгелёзу ў дзіцячых садках на паўднёвым усходзе Масквы перад Новым годам: ежу ў гэтыя ўстановы пастаўляе адзін з харчовых камбінатаў бізнесоўца.
Аднаўленне: Да месца здарэння прыехала паліцыя. Цяпер Максім Гаранін піша заяву.
ДД/ЛБ, belsat.eu
