Аляксандр Фядута 96-ты квартал, або «Марзалюк-шоу»

паліткансультант

Вестка пра тое, што дэпутат і член-карэспандэнт Нацыянальнай акадэміі навук Беларусі Ігар Марзалюк будзе весці ток-шоу на адным з дзяржаўных тэлеканалаў, наколькі можна меркаваць, зусім не з’яўляецца спантанным рашэннем улады і ніяк не звязаная ні з яго слязмі падчас паслання Аляксандра Лукашэнкі беларускіх гарадах і вёсках, ні з выбраннем прэзідэнтам Украіны Уладзіміра Зяленскага.

Людзі, якія ведаюць, як выглядае працэс падрыхтоўкі любой тэлевізійнай праграмы, пацвердзяць: працэс гэта доўгі, узгадненняў патрабуе шмат, а ўжо арганізацыйнай і дызайнерскай працы – тым больш. Так што журналістцы, якая сказала, што ідэю навеяла непасрэдная рэакцыя спадара Марзалюка на словы пра непахіснасць беларускага суверэнітэту, дазвольце не паверыць.

Але сам па сабе сімптом паказальны. Відавочна, што пашыраць ідэалагічнае прастору «беларускага свету» на падкантрольнай інфармацыйнай тэрыторыі ўлада мусіць. Запрасіць прафесіяналаў можна, але цяжка: тых, у чыіх вуснах беларуская мова гучыць натуральна і нязмушана, а беларуская гісторыя і культура складаюць частку іх светапогляду, пераважна або выжылі з дзяржаўнага эфіру, або яны самыя сышлі. У гэтых адносінах пройгрыш і «Белcату», і мультымедыйным інтэрнэт-рэсурсам відавочны. А Давыдзька… Ну – што Давыдзька? «Белая Русь» вам Давыдзька ўжо па самой назве, на яго ўжо аўдыторыю не прыманіш.

На Марзалюка – прыманіш. Мужчына мажны, вельмі нават недурны, з навуковай ступенню і іншымі рэгаліямі. Пры гэтым за словам у кішэню не палезе. Хочаце беларусізацыю тэлеканалаў? – Вось, калі ласка, атрымаеце. Потым яшчэ і Таню падцягнуць. Лену? Якая розніца. Абы па справе казала.

Дагэтуль улада ініцыявала з’яўленне ў эфірах тэлевізійных кілераў у духу Зімоўскага або адэптаў бязмежнай славяншчыны a la Гігін. Лічылася, што ужо гэтыя-то сапраўды дадуць бой беларускай апазіцыі. Цяпер «грушы» для гэтага «бою» неяк самі па сабе абсыпаліся, як хрызантэмы ў садзе са старога раманса. Затое на гарызонце зʼявіўся новы, куды больш страшны вораг, прычым сіла гэтага ворага вымяраецца ўжо не колькасцю людзей, якія выходзяць на святкавання Дня Волі або на пікетаванне рэстарана «Поедем поедим». Колькі ў нас там расейскіх тэлеканалаў бесперашкодна ахмураюць народ у эфіры? Шмат? Вось, трэба супрацьстаяць. Трэба казаць пра гісторыю, даючы бой вонкавых фальсіфікатарам з усходу. А заадно, калі што, і з захаду. Увогуле, атрымаецца такі soft-варыянт анты-Гігіна, на словах якога аб суверэнітэце і дзяржаўнасці ў студыі, пад тэлекамеру, заплачуць ад замілавання ня толькі Трусаў з Голубевым, але і ўсе гістарычнае супольнасць, уключаючы, дай Бог, Смаленчука і Краўцэвіча.

Хоць – не. Гэтыя двое не заплачуць. Цвёрдакаменныя яны. Шоу у духу «96-ты квартал», хто б яго ні вёў і на якой мове, на іх не падзейнічае. А на астатніх – чаму не паспрабаваць? Не падзейнічае Марзалюк – запросяць Генадзя Малахава з урынатэрапіяй. Апошняя, як вядома, шырокай публіцы не пашкодзіць.

Аляксандр Фядута/МВ belsat.eu

Меркаванне аўтараў можа не супадаць з пазіцыяй рэдакцыі.

Глядзі таксама
Каментары