У адміністрацыі Лукашэнкі патлумачылі, чаму Сафіі Сапезе адмовілі ў памілаванні
Грамадзянцы Расеі Сафіі Сапезе, якую ў Беларусі асудзілі на 6 гадоў калоніі, адмовілі ў памілаванні нібыта праз «неадпаведнасць ейнага звароту крытэрам». Пра гэта заявіла намесніца кіраўніка адміністрацыі Лукашэнкі Вольга Чупрыс.
«Адмоўлена цалкам законна. Каб адбыўся акт памілавання, неабходна, каб быў выкананы шэраг умоваў. Яна мае права звярнуцца, як і любыя іншыя грамадзяне Рэспублікі Беларусь, і іншаземцы. Тут ніякіх выключэнняў або нейкага перадузятага стаўлення», – сказала Вольга Чупрыс.
Таксама Чупрыс заявіла, што такі зварот заўсёды ацэньваецца на прадмет адпаведнасці крытэрам. Напрыклад, Сафія не адбыла паловы тэрміну:
«Асуджаная, якая выказала жаданне напісаць такое хадайніцтва на імя прэзідэнта, не адбыла нават хаця б паловы тэрміну, хаця яна мела права звярнуцца. У прэзідэнта было права памілаваць і ў гэтым выпадку. Але калі ацэньваць у цэлым усе крытэры, то ў гэтым выпадку выключэнняў, якія б паслужылі падставай для таго, каб кіраўнік дзяржавы прыняў такое рашэнне, не было».
Пра адмову ў памілаванні Сафіі Сапезе 10 студзеня стала вядома ад адваката асуджанай Антона Гашынскага. З моманту завяршэння першага этапу памілавання ў верасні прайшло паўгода. Тады адвакат распавядаў, што адміністрацыя калоніі дала станоўчае заключэнне аб хадайніцтве Соф’і і прызнала, што яна зрабіла ўсе захады для звароту за памілаваннем. Далей хадайніцтва разглядала камісія ў пытаннях памілавання пры Лукашэнку.
Сафію Сапегу затрымалі разам з Раманам Пратасевічам пасля пасадкі самалёта «Ryanair» у Менску. Яе называюць рэдактарам каналу «Чорная кніга Беларусі» і ў траўні 2022 яе прыгаварылі да 6 гадоў калоніі.
Алена Рувіна belsat.eu
