Міністэрства абароны Беларусі 31 студзеня аб’явіла аб пачатку «сумеснай штабной трэніроўкі Абʼяднанага камандавання рэгіянальнай групоўкі войскаў». На працягу тыдня расейскія і беларускія вайскоўцы будуць адпрацоўваць прыняцце рашэння аб прымяненні групоўкі.
«На працягу тыдня прадстаўнікі ваенных ведамстваў дзвюх дзяржаў адпрацуюць пытанні сумеснага планавання прымянення войскаў на аснове вопыту ўзброеных канфліктаў апошніх гадоў па тэме: «Прыняцце рашэння на прымяненне рэгіянальнай групоўкі войскаў (сіл) у інтарэсах забеспячэння ваеннай бяспекі Саюзнай дзяржавы», – паведамляе прэс-служба Мінабароны.
Паведамляецца, што гэты комплекс сумесных мерапрыемстваў накіраваны на «павышэнне сумяшчальнасці органаў ваеннага кіравання дзвюх дзяржаў» і з’яўляецца падрыхтоўкай да сумеснага аператыўнага вучэння «Шчыт Саюзу – 2023», якое пройдзе на тэрыторыі Расейскай Федэрацыі ў верасні 2023 года.
Таксама ў Беларусі з 1 лютага павінны скончыцца беларуска-расейскія лётныя вучэнні.
Алена Рувіна belsat.eu
