Праваабарончая супольнасць прызнала палітзняволенымі яшчэ трох чалавек. Гэта Аляксей Іванчыкаў, Андрэй Андрэеў і Аляксандр Комар.
Яны ўсе ўжо асуджаны па палітычна матываваных крымінальных справах, звязаных з пратэснымі акцыямі, нібыта ўжываннем гвалту ў дачыненні да супрацоўнікаў міліцыі ці супрацівам з ужываннем гвалту ў дачыненні да супрацоўніка МУС.
- Аляксей Іванчыкаў – асуджаны за гвалт у дачыненні да супрацоўніка органаў унутраных спраў да 2,5 гадоў пазбаўлення волі ў папраўчай калоніі за спробу ўцячы пры затрыманні, за выказванне крытыкі ў дачыненні да сябраў выбарчай камісіі падчас рэферэндуму, а таксама за антываенныя выказванні;
- Андрэй Андрэеў – асуджаны да 2 гадоў пазбаўлення волі ў папраўчай калоніі за пагрозу гвалтам у дачыненні да вайскоўца падчас антываеннага мітынгу. Ён зрабіў некалькі крокаў у бок гэтага вайскоўца, якія суд палічыў пагрозлівымі паводзінамі;
- Аляксандр Комар – асуджаны да 3 гадоў пазбаўлення волі ў папраўчай калоніі за пагрозу гвалтам у дачыненні да вайскоўца падчас антываеннага мітынгу. Ён таксама зрабіў некалькі крокаў у бок вайскоўца, а суд палічыў гэта пагрозлівымі паводзінамі. Таксама яго судзілі за рэгістрацыю ў тэлеграм-боце «Плана Перамога».
Праваабаронцы патрабуюць неадкладна вызваліць гэтых і астатніх палітычных зняволеных, спыніць палітычныя рэпрэсіі. На момант публікацыі праваабарончая супольнасць прызнала палітвязнямі 1309 чалавек.
Але напраўду зняволеных з палітычных матываў нашмат больш – праваабаронцы дэталёва аналізуюць кожную справу і проста не паспяваюць за рэпрэсіўным апаратам. Так, Следчы камітэт налічыў 11 тысячаў крымінальных справаў за «злачынствы экстрэмісцкай скіраванасці».
Алена Рувіна belsat.eu
