У Крычаве праз узняцце грунтавых водаў, у выніку якіх масава падтопленыя вуліцы і жылыя дамы, абвешчаны рэжым надзвычайнай сітуацыі. Горад стаіць на рацэ Сож.
Рэжым надзвычайнай сітуацыі ў горадзе ўвёў старшыня райвыканкаму Андрэй Седукоў.
«У першую чаргу, аказаць дапамогу тым жыхарам, у каго вада падышла да дамоў ці ўжо падтапіла іх. Працуем круглыя содні, пакуль не зліквідуем крытычнасць», – заявіў ён.
За содні ў Крычаве падтопленыя восем лёхаў на васьмі падворках. Таксама паведамляецца, што наладжаная бесперапынная праца гарачай лініі, куды могуць звярнуцца мясцовыя жыхары.
Усяго, паводле звестак МНС, расталымі і паводкавымі водамі ў Магілёўскай вобласці падтоплена 12 падворкаў, 9 лёхаў жылых дамоў, 7 гаспадарчых пабудоваў, 6 нізкаводных мастоў, 10 участкаў дарог.
Алена Рувіна belsat.eu
