Лукашэнка цынічна выкарыстоўвае мігрантаў для дэстабілізацыі сітуацыі ў Польшчы, Літве і Латвіі. Беларусы перадаюць уніформу мігрантам ва Узнажы, заявіў прэс-сакратар міністра каардынатара спецыяльных службаў Станіслаў Жарын.
«Вельмі верагодныя яшчэ і правакацыі», – папярэдзіў Станіслаў Жарын у сваім Twitter.
«Лукашэнка цынічна выкарыстоўвае мігрантаў для дэстабілізацыі Польшчы, Літвы і Латвіі. Апошняя інфармацыя памежнай службы сведчыць, што беларусы перадаюць уніформу мігрантам ва Узнажы. Вельмі верагодныя яшчэ правакацыі», – напісаў прэс -сакратар міністра каардынатара спецслужбаў.
Ён дадаў у свой пост Twitter памежнай аховы, які хвілінай раней прадстаўляў актуальную інфармацыю аб сітуацыі на польска-беларускай мяжы.
«Мы чакаем правакацыяў з беларускага боку. Беларускія службы аддаюць уніформу замежнікам, якія бадзяюцца на іх баку, нягледзячы на тое, што раней яны некалькі разоў атрымлівалі дапамогу, у тым ліку цёплую вопратку, ад прадстаўнікоў грамадскіх арганізацыяў Беларусі», – піша Памежная служба Польшчы.
Інфармацыю польскай памежнай службы пацвярджаюць таксама фотаздымкі, размешчаныя ў сеціве беларускім дэпутатам Тэнгізам Думбадзе. Разам з прадстаўніцай праўладнага Беларускага саюза жанчын Ліліяй Ананіч ён наведаў лагер для мігрантаў пад Узнажам Горным.
Акрамя таго, 28 верасня польская памежная служба апублікавала запіс з цеплавізійнай камеры, на якой бачна, які беларускія спецслужбоўцы выкарыстоўваюць лесвіцу, каб дапамагчы мігрантам пераадолець памежную драцяную агароджу. Беларускія ўлады працягваюць адмаўляць удзел у гэтым. Падчас брыфінгу 27 верасня з кіраўнікамі сілавых ведамстваў Аляксандр Лукашэнка заявіў, што «міжнародныя злачынныя групоўкі» датычныя да кантрабанды людзей з Беларусі ў Еўрапейскі звяз.
Прэс-сакратар памежнай службы Ганна Міхальска паведаміла, што за апошнія 24 гадзіны памежная служба зафіксавала 473 спробы незаконнага перасячэння мяжы з Беларусі ў Польшчу. З пачатку верасня памежная служба зафіксавала амаль 6 тысячаў спробаў незаконнага пераходу мяжы з Беларусі ў Польшчу.
Дзяржаўны памежны камітэт Беларусі пракаментаваў фотаздымкі мігрантаў у камуфляжы, маўляў, мігранты атрымалі курткі і штаны з камплектаў формы памежнікаў яшчэ тыдзень таму.
ПЯ belsat.eu