28 кастрычніка ўвечары прайшло паседжанне дысцыплінарнай камісіі Менскай гарадской калегіі адвакатаў, на якім разглядалася справа апошняга адваката Віктара Бабарыкі Яўгена Пыльчанкі. Камісія прыняла рашэнне выключыць Пыльчанку з адвакатуры – нібыта за сістэматычныя парушэнні заканадаўства аб адвакатуры, паведамляе «Радыё Свабода».
Раней, 19 кастрычніка, паводле загаду міністра юстыцыі ў дачыненні да Яўгена Пыльчанкі была распачатая дысцыплінарная вытворчасць, і яго адхілілі ад працы.
Асноўных прэтэнзіяў у камісіі, паводле самога Пыльчанкі, было дзве.
«Першая – нібыта я выказваў рэплікі, заўвагі падчас працэсу над Віктарам Бабарыкам. І ў судовых спрэчках даў ацэнку выступленням іншых адвакатаў. То бок за тое самае, за што выключылі Дзмітрыя Лаеўскага, – кажа адвакат. – А другое – за тое, што я абараняў адначасова Віктара Бабарыку і Святлану Купрэеву, сяброўку ягонай сям’і. І нібыта ў іх быў канфлікт інтарэсаў. Насамрэч пра канфлікт інтарэсаў я ніколі ня ведаў, і няма ніводнага дакументу, які пра гэта сведчыў бы. КДБ даслаў ліст, што ёсць канфлікт інтарэсаў – без абгрунтаванняў і прадстаўлення дакументаў. І дысцыплінарная камісія, натуральна, паверыла КДБ, а ня мне. І вырашыла, што я парушыў прафесійную этыку».
Адвакатам Яўген Пыльчанка працуе з 2012 году, з 2018 – у адвакацкім бюро «Лаеўскі і партнёры».
Пыльчанка абараняў экс-банкіра Віктара Бабарыку, сяброўку сям’і Бабарыкаў Святлану Купрэеву, свайго калегу адваката Максіма Знака.
Цяпер у Віктара Бабарыкі няма ніводнага з шасцярых адвакатаў. Максім Знак асуджаны на 10 гадоў, Ілля Салей з’ехаў з Беларусі, Аляксандра Пыльчанку пазбавілі ліцэнзіі яшчэ больш за год таму, Дзмітрыя Лаеўскага – у ліпені 2021 году, Наталлю Мацкевіч адхілілі ад працы 13 кастрычніка, а 25 кастрычніка выключылі з калегіі. І вось цяпер пазбаўлены ліцэнзіі апошні адвакат Бабарыкі Яўген Пыльчанка.
ГГ, belsat.eu