У Менску падчас рэйду КДБ па кватэрах адбылася страляніна. Двое забітых

КДБ ломіцца ў дзверы. Скрын з відэа КДБ

«Еўрарадыё» са спасылкай на свае крыніцы паведамляе пра страляніну, якая здарылася 28 верасня ў Менску падчас рэйду па кватэрах.

«Падчас «адпрацоўкі адрасоў» у адной з кватэр жыхар аказаў супраціў сілавікам – стрэліў у аднаго з іх з паляўнічай стрэльбы. Сілавікі ў адказ адкрылі агонь і застрэлілі мужчыну. Паранены супрацоўнік КДБ – загінуў», – паведамляе выданне.

КДБ пацвердзіў факт здарэння:

«Сёння ў падчас правядзення спецмерапрыемстваў па адпрацоўцы адрасоў, у якіх маглі знаходзіцца асобы, датычныя да тэрарыстычнай дзейнасці, у адной з кватэр жылога дому па супрацоўніках праваахоўных органаў быў адкрыты агонь з стрэльбы на паразу. Асабліва небяспечны злачынец у выніку смяротна параніў супрацоўніка Камітэту дзяржбяспекі. Агнём у адказ злачынец быў знішчаны. Супрацоўнік ад атрыманых ран памёр».

Распачатая крымінальная справа паводле ч.2 арт.139 КК («Забойства асобы ў сувязі з ажыццяўленнем ім службовай дзейнасці»).

Дэпартамент аховы выехаў па адрасе ў 13.34. Паведамленне пра агнястрэльнае раненне паступіла ў 13.40, піша Антон Матолька.

Хто забіты

Паводле папярэдняй інфармацыі, забіты жыхар кватэры – Андрэй Зельцар, супрацоўнік «EPAM Systems».

Крыніца «Белсату» ў «EPAM» пацвердзіла, што супрацоўнік з такім імем і прозвішчам у беларускім аддзяленні кампаніі сапраўды працуе. Паводле Instagram, ён цікавіўся фота і зброяй.

Як распавялі суседзі, Андрэй жыў разам з жонкай у яе кватэры. Гадавалі малога сына, вучня пачатковых класаў. Дзе знаходзіўся малы падчас страляніны, невядома, піша «Наша Ніва».

Паводле праўладных тэлеграм-каналаў, забіты супрацоўнік КДБ быў 1990 года нараджэння. У яго засталіся жонка і малое дзіця.

Што кажуць відавочцы

Відавочцы паведамляюць, што сёння ўвесь дзень сілавікі знаходзяцца па адрасе Якубоўскага, 29.

«Каля трэцяга падʼезда дому стаяць бус, легкавая машына і два аўтамабілі міліцыі. Шмат людзей у цывільным, міліцыянты ходзяць у бахілах і пальчатках», – перадаюць Naviny.by.

«Белсату» людзі, якія прадставіліся жыхарамі двару, паведамілі, што прачнуліся ад шуму, «ужо было поўна няпростых людзей».

«Бус СК ужо гадзін 8 стаіць на паркоўцы. Куча чужых машын», – паведамляюць нам.

Пастаноўка?

Само відэа выклікала шэраг пытанняў. З роліка незразумела, хто здымаў меркаванага стралка ў кватэры. Запіс змантаваны так, момант трапляння ў супрацоўніка КДБ не паказаны. Бачна толькі, як мужчына з стрэльбай страляе кудысьці ў калідор, а ў іншым змантаваным кавалку супрацоўнік у масцы страляе з пісталета туды, дзе, як мяркуецца знаходзіцца стрэлак. У наступных кадрах супрацоўнікі выцягваюць свайго калегу, называючы яго «Дзімка» і «Нірвана», вакол яго сляды крыві. Вылікаюць пытанні і да паводзінаў жанчыны на відэа.

«Каментаваць пакуль рана. Але пытанняў пакуль больш чым адказаў», – пракаментавалі здарэнне ў ініцыятыве беларускіх сілавікоў «BYPOL».

«Эээ… Каб стрэльба ў памяшканні так страляла? І пісталецікі нейкія цацачныя. І ў форме нікога няма. Я схільны лічыць, што пастаноўка. Калі з пісталета страляць у памяшканні, то там б’е па вушах, як з гарматы. А калі з драбавіка, то гук будзе адпаведным. І пісталецікі не табельныя», – на ўмовах ананімнасці распавёў «Белсату» былы афіцэр міліцыі.

Паводле яго, драбавікі больш гучныя нават на адкрытай мясцовасці. Таксама пры страляніне ў людзей мусяць дрыжаць рукі, чаго не бачна на відэа.

Свае заўвагі да відэа публікуе таксама «Zerkalo».

Жонка Зельцара на Акрэсціна

Цешча Андрэя Зельцара распавяла «Нашай Ніве», што нічога не ведае пра здарэнне:

«Я нічога не ведаю. Пра тое, што нешта адбылося, мы даведаліся, калі нам пазванілі з гімназіі, дзе вучыцца ўнук. Падчас усяго гэтага ён быў на вучобе. Нам пазваніў дырэктар гімназіі, і сказалі, што трэба будзе забраць унука.

Сілавікі паведамілі нам, што дачка на Акрэсціна. І ўсё. Сказалі, што больш ніякай інфармацыі даць не могуць, – кажа жанчына. – Я нічога не магу казаць ці думаць. Я ў шоку, не разумею, што адбываецца. Дачка – звычайны прадавец. Нічога не абяцала. Андрэй вельмі добры чалавек, выдатны зяць. Самы любімы чалавек. Спакойны, уважлівы, разважлівы, добры. Заўсёды дапамагае. Любая цешча марыла б пра такога зяця.

Адкуль у Андрэя зброя я не ведаю. З яго бацькамі мы пакуль камунікавалі толькі на тэму ўнука. Мы пакуль яшчэ ў шоку, не ведаю як гаварыць з імі пра гэта ўсё.

Ці лічу я Андрэя тэрарыстам? Канечне, не».

МГ belsat.eu

Падпісвайся на telegram Белсату

Hавiны