Палата прадстаўнікоў ухваліла законапраект «Аб адказным абыходжанні з жывёлаю». Да другога чытання ў дакумент унеслі некалькі зменаў, напрыклад, прыбралі норму аб абавязковым чыпаванні гаспадарамі сваіх гадаванцаў.
Дэпутаты канчаткова ўхвалілі законапраект «Аб адказным абыходжанні з жывёлаю». Да другога чытання ў дакумент унеслі некалькі зменаў.
У першай рэдакцыі было пазначана, што гаспадары абавязаныя чыпаваць сваіх гадаванцаў, цяпер гэта можна будзе зрабіць на ўласнае жаданне.
«З увагі на шматлікія просьбы грамадзянаў, асабліва ў сельскай мясцовасці, законапраектам прапанавана замацаваць не абавязанне, а права ўласніка на чыпаванне свайго гадаванца. Пры гэтым прадугледжваецца абавязак для заводчыкаў і гадавальнікаў чыпаваць прыплод да продажу», – паведамляе тэлеграм-канал Палаты прадстаўнікоў.
Акрамя таго, у законапраекце асобна прапісалі забарону на наведванне з жывёлінамі-кампаньёнамі харчовых крамаў. Першая рэдакцыя і без таго не дазваляла прыходзіць з гадаванцамі ў любыя крамы, акрамя заалагічных.
Таксама заканадаўцы забаранілі продаж жывёлінаў няпоўнагадовым асобам.
Каб памылкова не ўмярцвіць гадаванца з сімптомамі, уласцівымі заразным захворванням, дыягназ перад эўтаназіяй мусіць ставіць ветэрынар. Ён павінен знайсці хваробу з адмысловага пераліку, пазначана ў законапраекце.
У дакуменце таксама замацавалі, што «ягонае дзеянне не распаўсюджваецца на адносіны ў галіне абыходжання з бадзяжнымі катамі і беспароднымі сабакамі, якія знаходзяцца ў паляўнічых угоддзях».
Сцяпан Кубік belsat.eu
