Стваральнік забароненага ў Беларусі тэлеграм-каналу Сцяпан Пуціла і бацькі затрыманага журналіста Рамана Пратасевіча далі 27 траўня прэс-канферэнцыю ў Варшаве.
Частку прэс-канферэнцыі транслявалі ў жывым эфіры.
Наталля Пратасевіч, маці Рамана Пратасевіча, звярнулася да міжнароднай супольнасці з просьбаю дапамагчы: «Я малю, я заклікаю: выратуйце майго сына!»
Яна падкрэсліла, што Рамана пераследуюць за праўду, якую ён распавядаў як журналіст і блогер:
«Ён не заклікаў да масавых беспарадкаў, ён не заклікаў да гвалту, да ваенных дзеянняў. Ён проста распавядаў пра тое, што адбывалася і адбываецца ў Беларусі», – казала Наталля Пратасевіч.
Раманава маці ўпэўненая, што ў турме супраць ейнага сына ўжываюць гвалт, пра што сведчыць відэа, апублікаванае сілавікамі.
Сцяпан Пуціла, заснавальнік забароненага ў Беларусі тэлеграм-каналу, рэдактара якога раней затрымалі, на прэс-канферэнцыі назваў захоп самалёта «Ryanair» актам міжнароднага тэрарызму.
Ён падкрэсліў, што гэта была спланаваная аперацыя спецслужбаў Беларусі дзеля арышт Пратасевіча, «аднаго з галоўных асабістых ворагаў Лукашэнкі».
«Вельмі імаверна, што цяпер супраць Рамана выкарыстоўваюць катаванні», – кажа Сцяпан Пуціла.
Пуціла дадаў, што беларускі КДБ «выкарыстоўвае самыя забароненыя метады для ўплыву на затрыманых, нават хімічныя сродкі». Ён лічыць арышт Рамана помстаю за ягоную працу ў тэлеграм-канале «Nexta», які адыграў важную ролю ў пратэстах у Беларусі ў 2020 годзе.
«Мы – адныя з галоўных ворагаў Лукашэнкі», – заявіў Пуціла.
Да таго ж журналіст адзначыў, што ён і ягоная каманда рэгулярна атрымліваюць шмат пагрозаў. Ён просіць дапамогі і аховы. Блогер таксама заклікае да эканамічнага ціску на рэжым Лукашэнкі, бо адно гэта можа таго спыніць. Пуціла заявіў, што рэжым Лукашэнкі «разумее толькі мову моцы».
23 траўня самалёт «Ryanair», які ляцеў з Афінаў у Вільню, зрабіў вымушаную пасадку ў Менску праз інфармацыю пра мініраванне, якую экіпаж атрымаў ад беларускіх дыспетчараў. У Менску затрымалі прынамсі дваіх пасажыраў: блогера Рамана Пратасевіча і ягоную сяброўку Сафію Сапегу. Астатніх пасажыраў адпусцілі пад вечар. Генеральны дырэктар «Ryanair» назваў перанакіраванне самалёта ў Менск дзяржаўным пірацтвам, прэм’ер-міністр Польшчы – дзяржаўным тэрарызмам. Нямеччына асудзіла ў тым ліку відэа з прызнаннем палоннага Пратасевіча.
ІІ belsat.eu
