«Медуза» са спасылкай на крыніцы, блізкія да адміністрацыі прэзідэнта Расеі, паведамляе, што ў сярэдзіне траўня ў самаабвешчаных ЛНР і ДНР можа адбыцца рэферэндум аб далучэнні да Расеі. Верагодныя даты рэферэндумаў – 14 і 15 мая. Аднак не выключана, што даты могуць перанесці, з-за няўдач расейскай арміі на фронце.
Паводле выдання, самаабвешчаныя рэспублікі могуць афіцыйна далучыцца да «гістарычных» межаў Данецкай і Луганскай абласцей Украіны. Перад пачаткам вайны ва Украіне Уладзімір Пуцін заявіў, што Масква ўжо прызнала самаабвешчаныя ДНР і ЛНР у межах Данецкай і Луганскай абласцей.
Крыніцы выдання паведамляюць, што ў Херсонскай вобласці таксама можа быць праведзены рэферэндум. На галасаванне плануецца паставіць пытанне аб абвяшчэнні незалежнасці ад Украіны і аб стварэнні «Херсонскай народнай рэспублікі». У будучыні ўтварэнне таксама могуць далучыць да Расеі, мяркуюць суразмоўцы выдання.
У канцы сакавіка кіраўнікі самаабвешчаных ДНР і ЛНР Пушылін і Пасечнік казалі аб магчымасці правядзення рэферэндуму аб далучэнні да Расеі. Аднак кіраўнік самаабвешчанай ЛНР заявіў, што гэта яго прыватнае меркаванне, бо «мы не праводзім ніякіх дзеянняў, накіраваных на правядзенне ў бліжэйшы час рэферэндуму на тэрыторыі рэспублікі».
Пушылін адзначыў, што «жаданні і памкненні» далучыцца да Расеі выразна бачныя з 2014 года, «але цяпер галоўная задача – выйсці на канстытуцыйныя межы рэспублікі».
ЗХ belsat.eu
