Падчас выканання баявога задання на ўкраінска-беларускай мяжы загінуў 33-гадовы вайсковец тэрабароны Валыні Сяргей Панасюк. Пра гэта выданню «Суспільне. Новини» распавёў прэс-сакратар брыгады валынскай ТРА Сяргей Хамінскі.
Паводле Сяргея Хамінскага, вайсковец загінуў на досвітку 25 лютага. Цяпер высвятляюцца абставіны, пры якіх гэта адбылося. «Следства вядуць праваахоўныя органы, таксама праводзіцца службовае расследаванне адпаведнымі падраздзяленнямі брыгады», – сказаў прадстаўнік брыгады.
У Нацыянальнай паліцыі паведамілі, што вядзецца справа паводле артыкулу аб наўмысным забойстве і заявілі, што стралялі не з боку Беларусі.
«Дакладна вядома, што стрэлы былі зробленыя не з боку Беларусі. Падрабязнасці будуць высвятляцца ў хадзе дасудовага расследавання», – паведаміла прадстаўніца Нацпаліцыі Марына Балдыч.
Сяргей Панасюк быў удзельнікам АТА. У шэрагі тэрабароны ўступіў у першыя дні поўнамаштабнага ўварвання, быў камандзірам стралковага ўзводу. У яго засталіся дачка і сын.
Раней у сацыяльных сетках з’явілася інфармацыя пра страляніну на мяжы з Беларуссю. У Памежным камітэце Беларусі гэта зняпраўдзілі, заявіўшы, што «інцыдэнтаў з ужываннем зброі не было, агню памежнікі не адкрывалі».
Алена Рувіна belsat.eu