Сілавікі ў Беларусі працягваюць паляваць на тых, хто данаціў грошы арганізацыям, прызнаным уладамі «экстрэмісцкімі». Кагосьці караюць судом і зняволеннем, хтосьці, каб пазбегнуць турмы, ідзе і сам прапаноўвае адкупіцца ды пераводзіць буйныя сумы туды, куды ўкажуць. Хроніка рэпрэсіяў у Беларусі ў суботу 27 студзеня – у нашым аглядзе.
Праваабаронцам стала вядома пра суворы прысуд, вынесены за данат менчуку Андрэю Савінскаму. Менскі гарадскі суд абвінаваціў мужчыну ў распальванні сацыяльнай варожасці (ч.1 арт.130 КК РБ) і фінансаванні экстрэмісцкай дзейнасці (ч.1 і ч.2 арт.361-2 КК). Справу разглядала суддзя Вера Галаўкова.
Паводле абвінавачання, Савінскі за 1,5 гады перавёў на рахункі фондаў, прызнаных уладамі «экстрэмісцкімі», суму, эквівалентную 50$, а акрамя таго ў адным з тэлеграм-чатаў размясціў чатыры тэкставыя паведамленні, нібыта скіраваныя на распальванне сацыяльнай варожасці ў грамадстве.
У выніку Андрэю прызначылі 5 гадоў пазбаўлення волі, а таксама штраф у памеры 200 базавых велічыняў (7 400 рублёў).
Дзве жыхаркі Рагачову, каб пазбегнуць турмы за данаты, самі прыйшлі да сілавікоў і распавялі, што пераводзілі грошы розным арганізацыямі з дапамогай плацежнай сістэмы PayPal. Як сцвярджае тэлеграм-канал, блізкі да сілавых структураў, жанчыны добраахвотна зрабілі дабрачыннае ахвяраванне на карысць хворых дзяцей, каб «выкупіць сваю віну».
Стала вядома, што 26 студзеня ў Гарадзенскай вобласці прайшоў шэраг судоў за распаўсюд «экстрэмісцкіх» матэрыялаў (ч.2 арт.19.11 КаАП РБ).
У Лідзе судзілі: Сяргея Навіцкага, Вадзіма Адамчыка, Андрэя Руткоўскага, Андрэя Бурноса. У Наваградку – Андрэя Зыльмана. У Смаргоні – Уладзіміра Жабінскага. І ў Ашмянах – Інэсу Крысанаву.
Таксама ў судзе Лідскага раёну прайшоў суд над Віктарам Кальчуком за «несанкцыянаванае масавае мерапрыемства» (арт.24.23 КаАП РБ).
Рашэнні судоў невядомыя.
27 студзеня Лукашэнка падоўжыў тэрмін працы «Камісіі па разглядзе зваротаў грамадзянаў Беларусі, якія знаходзяцца за мяжой, у пытаннях учыненымі ім злачынстваў» да канца 2024 года. Паводле звестак праваабаронцаў, у 2023 годзе сілавікі затрымалі мінімум 207 беларусаў, якія ехалі дадому з-за мяжы. Улады аб колькасці зваротаў і пакаранняў тых, хто паверыў камісіі, не кажуць. У снежні праваабаронцы распавялі пра берасцейца, які вярнуўся дадому праз «камісію вяртання» і быў пакараны годам калоніі.
Марыя Міхалевіч belsat.eu
