Belsat.eu падводзіць вынікі 26-га дня пратэстаў у краіне.
Сёння Аляксандр Лукашэнка абвясціў пра кадравыя перастаноўкі ў Беларусі. Перадусім яны датычыліся сілавога блоку. Вячаслаў Расалай стаў намеснікам старшыні вайскова-прамысловага камітэту, былы кіраўнік КДБ Валерый Вакульчык стаў кіраўніком Савету Бяспекі Беларусі, колішні старшыня КДК Іван Церцель заняў пасаду старшыні КДБ. Першы намеснік старшыні КДК Васіль Герасімаў стане старшынёю гэтага ведамства, былы старшыня Менгарвыканкаму Анатоль Сівак стаў першым прэм’ер-міністра, а Менгарвыканкам узначаліў Уладзімір Кухараў.
Таксама былі замененыя кіраўнікі некаторых раёнаў Беларусі.
Сёння ў Менск прыляцеў Міхаіл Мішусцін. Разам з прыехала ледзь не палова ўраду РФ: віцэ-прэмʼеры Дзмітрый Чарнышэнка і Аляксей Авярчук, кіраўнік Мінэнерга Аляксандр Новак, кіраўнік Мінпрамгандлю Дзяніс Мантураў, міністр культуры Вольга Любімава і кіраўнік Мінспорту Алег Матыцын, а таксама міністр аховы здароўя Міхаіл Мурашка.
Лукашэнка такі жэст ацаніў, і паабяцаў, што беларускі прэмʼер-міністр Раман Галоўчанка першы выпрабуе на сабе расейскую вакцыну ад COVID-19.
Таксама ён распавёў, што падслухаў размову канцлера ФРГ Ангелы Мэркель і польскага прэзідэнта Анджэя Дуды. Маўляў, Мэркель заявіла пра атручанне Аляксея Навальнага, каб Пуцін не ўмешваўся ў беларускія справы. Нямецкі жа бок зняпраўдзіў гэтыя звесткі.
Міхаіл Мішусцін абвясціў, што Расея і Беларусь нарэшце здолелі дамовіцца наконт коштаў на энерганосьбіты. Аднак падрабязнасцяў не патлумачыў.
Журналісты TUT.by Надзея Калініна і Аляксей Суднікаў, журналісты «Камсамольскай праўды ў Беларусі» Марыя Эльяшэвіч, Святаслаў Зоркі і Мікіта Недаверкаў, а таксама журналіст БелаПАН Андрэй Шаўлюга ўжо трэці дзень знаходзяцца за кратамі.
Іх абвінавачваюць ва ўдзеле ў несанкцыянаваным масавым мерапрыемстве паводле арт. 23.34, хоць усе яны не былі ўдзельнікамі пратэстаў, а толькі працавалі на іх. На журналістах былі камізэлькі «прэса» і яны мелі пры сабе журналісцкае пасведчанне. Але сілавікі мяркуюць, што яны актыўна ўдзельнічалі і нават каардынавалі пратэст.
На знак салідарнасці з калегамі журналісты сабраліся каля Міністэрства ўнутраных спраў і патрабавалі вызваліць незаконна затрыманых калег. Міністр Караеў не выйшаў на размову. Людзі ў цывільным затрымалі фатографа TUT.by Дзмітрыя Брушко. Яго адпусцілі праз 2 гадзіны, склаўшы пратакол паводле арт. 17.1 (хуліганства). Ён нібыта пхнуў міліцыянта.
Сёння праходзілі суды над затрыманых падчас пратэстаў 2 верасня. Ёсць і вядомыя імёны: па 10 дзён адміністрацыйнага арышту атрымалі былыя вядоўцы дзяржаўных тэлеканалаў Дзмітрый Кахно і Дзяніс Дудзінскі. На знак пратэсту супраць арышту Дзяніса Дудзінскага сучасны мастацкі тэатр абвясціў пра забастоўку.
Чальцы Каардынацыйнай Рады Вольга Кавалькова і Сяргей Дылеўскі былі наноў асуджаныя на 15 дзён.
Агулам за ўдзел у мірных пратэстах 2 верасня па ўсёй Беларусі былі асуджаныя 24 чалавекі.
Па ўсёй краіне працягваюцца пратэсты і супрацьстаянні. Студэнты зладзілі «чысты чацвер» і масава выходзяць з БРСМ. У некаторых вучэльнях нават утварыліся чэргі з ахвочых падаць заяву на выхад з арганізацыі. А працаўнікі гарадзенскай фабрыкі «Акцэнт» масава выйшлі з дзяржаўнага прафсаюзу.
Пратэсты вярнуліся ў спальныя раёны Менску! Пратэстуюць Уручча, Серабранка, Шабаны, Лошыца, жыхары вуліц Маякоўскага, Матусевіча і Партызанскага праспекту. На плошчы Незалежнасці каля Чырвонага касцёлу таксама былі мірныя сходы.
Студэнты-медыкі ізноў выйшлі ў жывы ланцуг каля БДМУ.
Жанчыны сабраліся на акцыю салідарнасці каля Нацыянальнага мастацкага музею.
Не абышлося без затрыманняў. Праваабарончы цэнтр «Вясна» паведамляе пра 11 затрыманых па ўсёй Беларусі.
КТ belsat.eu