80% з 2000 кампаній, якія пераехалі пасля 2020 года ў Еўразвяз, аселі ў Польшчы, 10% – у Літве. Гэтыя лічбы былі агучаны Асацыяцыяй беларускага бізнесу за мяжой падчас правядзення II Беларускага бізнес-форуму ў Вільні.
Як адзначыў віцэ-прэзідэнт і прадстаўнік Асацыяцыі беларускага бізнесу за мяжой (ABBA) у Літве, Латвіі і Эстоніі Сяргей Наўродскі, пасля жніўня 2020 года беларускі бізнес зазнаў меншую хвалю эміграцыі ў параўнанні з той, што адбылася ў 2022-м, пасля пачатку вайны з Украінай.
Пры гэтым ІТ-сектар знаходзіцца далёка не на першым месцы. У лідарах апынуліся кампаніі аптова-рознічнага гандлю, многія з якіх маюць беларускіх «дачок».
Следам за імі ідуць кампаніі са сферы паслуг – касметычныя, аўтасэрвісы, кансультацыйныя і іншыя.
Трэцяе месца – у кампаній, якія займаюцца вытворчасцю.
У той жа час, як адзначыў Сяргей Наўродскі, менавіта ІТ-сектар стварае найбольшую колькасць працоўных месцаў – «сотні, а часам і больш». Так, паводле ягоных словаў, у Літве такія кампаніі стварылі каля 6000 працоўных месцаў і прыкладна столькі ж – у Польшчы.
Раман Шавель belsat.eu
