«Белсат» традыцыйна падводзіць вынікі дня. Пра самыя важныя падзеі чацвярга, 25 лістапада, чытайце ў нашым аглядзе.
Ініцыятыва былых сілавікоў «ByPol» апублікавала расследаванне, прысвечанае фэйкаваму тэракту на Дзень Волі 2021 года, у арганізацыі якога рэжым Лукашэнкі абвінаваціў лідараў апазіцыі. Паводле інфармацыі «ByPol», тэракт насамрэч рыхтаваўся пры ўдзеле ГУБАЗіКу.
Падзеі, пра якія распавядаецца ў расследаванні «ByPol», адбыліся ў сакавіку. 24 сакавіка «ByPol» абвесціў, што атрымаў інфармацыю пра рыхтаванне тэракту ў адным з будынкаў органаў унутраных справаў сіламі Камітэту дзяржбяспекі. Мэта – дыскрэдытаваць пратэставы рух. Аднак 26 сакавіка ў МУС Беларусі самі заявілі пра перадухіленне тэрактаў. Затрымалі 35-гадовага жыхара Пінскага раёну Вячаслава Малейчука, які нібыта меў намер падарваць дзве самаробныя выбухоўкі (адну – у Менску на дзіцячай пляцоўцы, другую – каля вайсковай часткі ў Печах). Апазіцыйных палітыкаў Святлану Ціханоўскую і Паўла Латушку, а таксама шэраг былых сілавікоў, звязаных з ініцыятываю «ByPol», улады абвесцілі тэрарыстамі.
Мігранты ляцяць з Беларусі дамоў. Паводле іракскага консула, больш за тысячу грамадзянаў Іраку выказалі жаданне вярнуцца. На 25 і 26 лістапада Нацыянальны аэрапорт «Менск» анансаваў два вывазных рэйсы ад авіякампаніі Iraqi Airways.
Рэйс, прызначаны на 14.30 25 лістапада, быў адменены. Дзяржсакратар Савету бяспекі Аляксандр Вальфовіч паскардзіўся, што Еўразвяз не спяшаецца дапамагаць вывазам мігрантаў:
«Дзе дапамога з боку Еўразвязу? Яе проста не бачна. Таму Беларусь дзейнічае і будзе дзейнічаць як нармальная цывілізаваная еўрапейская дзяржава ў адпаведнасці з усімі міжнароднымі нормамі і патрабаваннямі, выконваць усе міжнародныя дамовы», – заявіў Вальфовіч.
Пры гэтым мігранты, якія застаюцца ў Беларусі, усцяж спрабуюць атакаваць беларуска-польскую мяжу.
24 лістапада польскія памежнікі зафіксавалі 375 спробаў нелегальна перайсці беларуска-польскую мяжу. Пра гэта ў Twitter паведамляе Памежная ахова Польшчы.
Стала вядомая дата пачатку суду над блогерам Эдуардам Пальчысам. Слуханне пачнецца 6 снежня ў 10.00. Працэс пройдзе ў Менскім гарадскім судзе.
Супраць Пальчыса выставілі чатыры артыкулы:
Гарадзенскага музыку, палітвязня Ігара Банцэра, які адбывае пакаранне ў папраўчай установе на «хіміі» 25 лістапада зноў адправілі ў ШІЗА на 10 содняў. 22 лістапада яго адпусцілі пасля папярэдняга пакарання ШІЗА. Разам з цяперашнім тэрмінам музыка правядзе ў штрафным ізалятары 70 содняў.
У Віцебскім тэатры ім.Якуба Коласа, дзе звальняюць дырэктара пасля воклічаў «Жыве Фландрыя» у прэм’ерным спектаклі, не працягнулі кантракты таксама траім акторам.
Імёны актораў, якіх звальняюць з тэатру ўслед за дырэктарам Аляксандрам Старых: Анжаліка Баркоўская, Юлія Крашэўская, Арцём Герак. З 2 студзеня 2022 году яны застаюцца без працы.
Старшыні Саюзу Палякаў у Беларусі Анджэліцы Борыс працягнулі арышт яшчэ на тры месяцы – яна застанецца пад вартай да 25 лютага 2022 году. Імаверна, пастанова аб працягненні тэрміну арышту датычыць таксама журналіста Анджэя Пачобута.
ГГ, belsat.eu