Менскай сярэдняй школе № 153 у Серабранцы прысвоілі імя праўладнага актывіста і паралімпійца Аляксея Талая. Пра гэта паведамілі ва ўпраўленні адукацыі адміністрацыі Ленінскага раёну. Ён актыўна падтрымлівае ўлады і Лукашэнку, а таксама вайну ва Украіне. Талай залучаны ва ўкраінскую базу «Міратворац» за наведанне акупаванага Данбасу.
«Актыўная жыццёвая і грамадзянская пазіцыя Аляксея Талая, ягоны ўнёсак у прасоўванне міратворчых ідэяў, сугучны прынцыпам і каштоўнасцям, якія мы як школа свету ставім сваёй мэтай выхоўваць у нашых навучэнцаў», – заявіла дырэктарка школы Марына Паляшчук.
У 2020 годзе Аляксей Талай актыўна падтрымліваў Лукашэнку, браў актыўны ўдзел у праўладным аўтапрабегу і розных імпрэзах. Цяпер Талай займаецца бізнесам, таксама ён чалец беларускай паралімпійскай зборнай і чэмпіён свету і Еўропы па плаванні.
Ва Украіне Талая залучылі ў базу «Міратворац» за парушэнне дзяржаўнай мяжы краіны. Ён падтрымлівае самаабвешчаныя рэспублікі «ДНР» і «ЛНР», некалькі разоў ездзіў на Данбас нібыта «з гуманітарнаю місіяй ад беларускага народу».
Алена Рувіна belsat.eu