У перыяд з 9 жніўня 2020 года да 9 жніўня 2021 года тэрытарыяльнымі следчымі падраздзяленнямі УСК у Гомельскай вобласці распачата 415 крымінальных справаў за ўдзел у пратэстах ды іншадумства.
Па выніках расследавання 94 крымінальныя справы ў дачыненні 117 асобаў перададзеныя пракурору для накіравання ў суд, паведамляюць у Следчым камітэце.
За гэты перыяд найбольшая колькасць крымінальных справаў распачатая паводле артыкулаў «Абраза прадстаўніка ўлады», «Апаганьванне будынкаў і псаванне маёмасці», «Паклёп», «Абраза прэзідэнта», «Гвалт альбо пагроза ўжывання гвалту ў дачыненні супрацоўніка органаў унутраных справаў».
Напрыклад, 21-гадовы нарадзінец Добрушскага раёну ўлетку 2020 года склаў песню, у якой нібыта ёсць абраза Аляксандра Лукашэнкі, і размясціў яе ў інтэрнэце. Крымінальная справа на маладога чалавека паступіла ў суд.
У верасні 2020 года індывідуальны прадпрымальнік з Гомля размясціў у пратэставым Telegram-чаце некалькі каментароў, у якіх нібыта заклікаў аказваць супраціў сілавікам. 45-гадоваму гамельчуку было выстаўлена абвінавачанне ў здзяйсненні злачынства паводле ч. 1 арт. 130 («Наўмысныя дзеянні, накіраваныя на ўзбуджэнне іншай сацыяльнай варожасці паводле прыкметы іншай сацыяльнай прыналежнасці») КК. Цяпер ідзе судовы працэс.
У Мазыры 28-гадовы блогер у відэачаце, які працуе згодна з прынцыпам выпадковай выбаркі, у снежні 2020 года звязаўся з карыстальнікам, які аказаўся сілавіком. У СК кажуць, што блогер задаваў сілавіку «правакацыйныя пытанні» і «пагражаў ужываннем гвалту да ягоных блізкіх». У выніку жыхара Мазыра пакаралі 2,5 гадамі «хіміі».
ІІ belsat.eu