Аляксандр Лукашэнка 25 ліпеня падпісаў закон, якім змяняюцца і дапаўняюцца нормы Кодэксу аб культуры. Пра гэта паведамляе ягоная прэс-служба.
У прыватнасці, законам уводзіцца абавязак атрымання пасведчання на права арганізацыі і правядзення культурна-забаўляльнага мерапрыемства ўсімі арганізатарамі, акрамя фізічных асобаў, якія праводзяць імпрэзу для ўласных патрэбаў і без атрымання прыбытку (юбілеі, вяселлі і гэтак далей).
Прадугледжваецца сістэма абавязковага ўключэння Міністэрствам культуры арганізатараў культурна-забаўляльных мерапрыемстваў у адпаведны рэестр. Правядзенне культурных мерапрыемстваў будзе магчымае толькі ўключанымі ў рэестр арганізатарамі.
Акрамя таго, папраўкі прадугледжваюць, што экскурсіі ў музеях будзе дазволена праводзіць толькі работнікам гэтых музеяў.
Таксама вызначаецца прыярытэтнае права на набыццё культурных каштоўнасцяў дзяржаўнымі арганізацыямі культуры ў выпадку прыняцця ўласнікам рашэння аб іх адчужэнні.
Глеб Нержын belsat.eu