Украіна змякчыла забарону на выезд за мяжу для мужчын прызыўнога ўзросту, якая была ўведзена з расейскім уварваннем ва Украіну 24 лютага.
Кабінет міністраў унёс змены ў правілы перасячэння дзяржмяжы Украіны для некаторых катэгорый грамадзян.
Цяпер выязджаць з Украіны змогуць:
- кіроўцы, якія перавозяць медыцынскія грузы, гуманітарную дапамогу для патрэб ЗСУ, а таксама насельніцтва Украіны;
- звычайныя дальнабойшчыкі;
- чыгуначнікі;
- спартоўцы і трэнеры, якія ўдзельнічаюць у міжнародных спаборніцтвах або рыхтуюцца да іх.
Раней аб неабходнасці аслабіць забарону на выезд заяўляў спікер Вярхоўнай Рады Руслан Стэфанчук. Паводле яго слоў, заканадаўчыя абмежаванні прадугледжаны не проста так: кожны павінен усвядоміць свой абавязак перад Украінай. У той жа час, падкрэсліў спікер, заканадаўчымі ініцыятывамі чалавека не змяніць. Бо тыя, хто хацеў уцячы – ужо паспрабаваў. А тыя, хто меў від на жыхарства за мяжой, але адчуваў абавязак перад радзімай – мабілізаваўся.
Раней, 21 траўня, прэзідэнту Украіны Уладзіміру Зяленскаму была перададзена петыцыя аб адмене забароны для мужчын прызыўнога ўзросту выязджаць за межы Украіны, калі яна набрала неабходныя 25 тысяч галасоў.
Забарона на выезд з Украіны дзейнічае ў адносінах да мужчын з украінскім грамадзянствам прызыўнага ўзросту – ад 18 да 60 гадоў.
Алена Рувіна belsat.eu
