Ангельскае выданне «The Guardian» паведамляе, што камандзір палка «Азоў» змог стэлефанавацца з жонкай. Дзяніс Пракапенка паведаміў, што іх трымаюць у турме ў здавальняльных умовах, і яны не зазнаюць катаванняў.
Камандзір палка «Азоў» Дзяніс Пракапенка змог патэлефанаваць сваёй жонцы і нядоўга паразмаўляць з ёй. Вайсковец распавёў, што ўкраінскіх вайскоўцаў, узятых у палон на «Азоўсталі», трымаюць у здавальняльных умовах. Таксама ён адзначыў, што яны не зазнаюць катаванняў.
«Іх кормяць, даюць пітную ваду. Умовы адпавядаюць патрабаванням, і за гэты кароткі перыяд яны не зазнавалі гвалту. Што будзе далей, мы, вядома, не ведаем, але на гэты момант ёсць трэція бакі – ААН і Чырвоны Крыж, якія кантралююць сітуацыю» – перадала словы мужа Кацярына Пракапенка.
Кацярына адзначыла, што тэлефанаванне яе мужа ўзгаднялі ўрады Украіны і Расеі пры пасярэдніцтве Чырвонага Крыжа.
Таксама Кацярына Пракапенка паведаміла, што большасць параненых байцоў «Азова» застаюцца ў турме ў вёсцы Аленаўка. Цяжкапараненыя, якіх няшмат, ляжаць у шпіталі ў горадзе Новаазоўск. Са словаў Кацярыны Пракапенкі, нікога з палонных украінскіх вайскоўцаў, наколькі ёй вядома, у Расею не вывезлі.
Нагадаем, што ўвечары 16 траўня пасля амаль трох месяцаў жорсткіх баёў украінскі бок заявіў пра пачатак аперацыі дзеля выратавання абаронцаў «Азоўсталі». Паводле ацэнак брытанскай выведкі, на раніцу 20 траўня ў палон трапілі 1700 вайскоўцаў. Паводле ацэнак расейскага боку ў палон трапілі 2439 украінскіх вайскоўцаў.
Раман Лугоўскі belsat.eu
