Беларускі Дэпартамент авіяцыі апублікаваў расшыфроўку перамоваў з экіпажам «Ryanair»

Дэпартамент авіяцыі Міністэрства транспарту Беларусі апублікаваў тэкставую расшыфроўку перамоваў беларускага дыспетчара з рэйсам «Rianair» RYR1TZ / FR4978, які 23 траўня ляцеў з Афінаў у Вільню, але сеў у Менску.

Сайт Дэпартаменту авіяцыі пасля гэтага стаў недасяжны, аднак захавалася архіўная копія. Перамовы вяліся на англійскай мове.

З расшыфроўкі вынікае, што пра бомбу пілоту паведамілі практычна адразу, як толькі самалёт апынуўся ў паветранай прасторы Беларусі, і прапанавалі сесці ў Менску. Пілот пэўны час вагаўся, не разумеючы, адкуль прыйшла інфармацыя пра бомбу, і спрабаваў звязацца з віленскім аэрапортам і кампаніяй «Rianair». З расшыфроўкі вынікае, што пагрозаў і патрабаванняў з беларускага боку не было, аднак аўдыя перамоваў не публікавалі – толькі тэкст.

У расшыфроўцы ёсць такія радкі.

Дыспетчар (12:30 паводле менскага часу): Для вашай інфармацыі, мы маем інфармацыю ад спецыяльных службаў, што ў вас на борце бомба, і яе могуць актываваць над Вільняй.

Пілот (12:31): ОК, не маглі б вы паўтарыць паведамленне?

Д: Я зноў кажу, мы маем інфармацыю ад спецыяльных службаў, што ў вас на борце бомба, і яе могуць актываваць над Вільняй.

П: Зразумеў, чакаю.

Д: З меркаванняў бяспекі мы рэкамендуем вам прызямліцца на UMMS (пазначэнне Нацыянальнага аэрарорту «Менск». – «Белсат»).

П: Добра… гэта… гэта… зразумела, дайце нам альтэрнатыву, калі ласка.

(…)

П (12.32): Бомба… прамое паведамленне, адкуль яна ўзялася? Адкуль у вас была інфармацыя пра гэта?

Д: Чакайце, калі ласка.

П: Працягвайце.

Д: Служба бяспекі аэрапорту RYR 1TZ паведаміла, што атрымала на электронную пошту.

П: Прынята, служба бяспекі аэрапорту Вільні ці з Грэцыі?

Д: Гэты ліст быў перададзены некалькім аэрапортам (іншыя аэрапорты не паведамлялі пра такія лісты. – «Белсат»).

П: Не маглі б вы даць нам частату для (неразборліва) кампаніі, каб мы маглі (неразборліва).

Д: Яшчэ раз скажыце, якая частата вам патрэбна.

П: Нам проста трэба пачырыкаць з кампаніяй, калі для гэтага існуе частата (неразборліва).

Д: Вам трэба частата «Ryanair»?

П: Так, слушна.

Д: Чакайце.

(…)

П (12.39): Ёсць навіны?

Д: Будзьце на сувязі, чакаем інфармацыі.

П: Не маглі б вы яшчэ раз сказаць, што я павінен звязацца з аэрапортам, які ўлады … (неразборліва) перанакіруюць у… (…) Ці можаце вы яшчэ раз сказаць код IATA аэрапорту, на які нам рэкамендавалі перанакіравацца ўлады?

Д: Прыняў, чакайце, калі ласка.

П: ОК, даю вам (неразборліва), ці можаце вы яшчэ раз сказаць код IATA аэрапорту, на які ўлады рэкамендавалі нам перанакіравацца?

Д: Чакайце.

(…)

Д (12:41): Код MSQ.

(…)

П (12:41): Яшчэ раз, гэтая рэкамендацыя, перанакіраваць у Менск, адкуль прыйшла? Адкуль? Кампанія? Яна прыйшла ад кіраўніцтва аэрапорту вылету альбо ад аэрапорту прыбыцця?

Д: Гэта нашы рэкамендацыі.

П: Вы можаце сказаць яшчэ раз?

Д: Гэта нашы рэкамендацыі.

П: (неразборліва) Вы кажаце, гэта вашая рэкамендацыя?

Д: Чарлі-чарлі (значыць, «так». – «Белсат»).

Д: У нас ёсць частата наземнай каманды ў Вільні 131.750.

П: 131.75 у нас ёсць кантакт (неразборліва).

Д (12.44): Скажаце вашае рашэнне, калі ласка?

П: Мне трэба адказ на пытанне, які код (неразборліва), зялёны, жоўты ці бурштынавы чырвоны.

Д: Чакайце.

П: Кажуць, што код чырвоны.

Ж: Зразумеў, у такім разе просім трымацца цяперашняй пазіцыі.

Д: Прыняў, трымайце цяперашнюю пазіцыю, падтрымлівайце паварот на [вышыні] FL390 на ўласнае меркаванне.

П (12.47): Мы абвяшчаем трывогу, Мэйдэй! Мэйдэй! Мэйдэй! Мы намераныя перанакіравацца на менскі аэрапорт.

Пасля гэтага пілот і дыспетчар толькі кансультуюцца пра надаор’е, задэклараваныя небяспечныя грузы на борце (іх не было) і працэс пасадкі. Пілот у расшыфроўцы сцвярджае, што на борце 133 чалавекі (літоўскія ўлады казалі, што на самалёт сядалі 136 пасажыраў, да Вільні даляцеў 131).

Многія замежныя палітыкі не вераць заявам беларускага боку і звязваюць перанакіраванне самалёта ў Менск з патрэбай затрымаць журналіста Рамана Пратасевіча, які быў на борце.

Францыя і Вялікая Брытанія забаранілі палёты «Белавіі», Украіна спыніла авіязлучэнне, Літва не прымае самалётаў, якія пралятаюць над Беларуссю. Шэраг авіякампаніяў перанакіроўвае палёты за межы беларускай паветранай прасторы нават без распараджэння ўладаў.

АА belsat.eu