Кіраўнік апарату прэмʼер-міністра Нікола Пашыньяна Араік Аруцюнян рэзка выказаўся наконт прапагандысцкай кампаніі Крамля, накіраванай супраць Арменіі.
«Відаць, у гібрыднай вайне, развязанай у расейскімі медыямі супраць Арменіі, абяцалі, як у вядомай казцы, – той, хто больш хлусіць, атрымае палову палаца/Крамля», – напісаў ён у Facebook 23 верасня.
Такім чынам Аруцюнян адрэагаваў на сюжэт тэлеканала НТВ, дзе сцвярджалася: нібыта 20 верасня пратэстоўцы ў Ерэване прарваліся ў будынак урада і сутыкнуліся там з амерыканскімі дэсантнікамі.
«Гэта абсалютная дэзынфармацыя», – падкрэсліў ён. Паводле кіраўніка апарата Пашыньяна, ніводзін пратэстовец у той дзень не пракраўся ў будынак урада і ніякіх амерыканскіх вайскоўцаў там не было.
У постскрыптуме Аруцюнян задаецца пытаннем, чаму так атрымалася, што найгоршымі прапагандыстамі расейскіх тэлеканалаў зʼяўляюцца армяне (Маргарыта Сімоньян, Тыгран Кеасаян і г.д.).
Нагадаем, 19 верасня Азербайджан распачаў у Нагорным Карабаху вайсковую аперацыю, у выніку чаго сепаратысцкія ўлады рэгіёну дэ-факта пагадзіліся на капітуляцыю. Перамога Азербайджану выклікала антыўрадавыя пратэсты ў Ерэване.
Хаця РФ з’яўляецца саюзнікам Арменіі па АДКБ, крамлёўская прапаганда выставіла паразу Арменіі як заканамернае пакаранне Пашыньяну за тое, што ён нібыта здрадзіў Расеі і хацеў сябраваць з Захадам.
Глеб Нержын belsat.eu
