Разам з рэферэндумамі ў самаабвешчаных рэспубліках Данбасу можа прайсці плебісцыт аб «зліцці» з Расеяй у Беларусі, паведамляе расейскае выданне «Meduza» са спасылкай на свае крыніцы.
Выданне сцвярджае, што ў Крамлі не адмовіліся ад ідэі правесці рэферэндумы наконт далучэння да Расеі самаабвешчаных ДНР і ЛНР, а таксама занятай расейскімі войскамі Херсонскай вобласці. Калі менавіта яны могуць прайсці, залежыць ад сітуацыі на фронце. Пакуль самая рэалістычная дата – 11 верасня, у адзіны дзень галасавання.
Са словаў суразмоўцаў выдання, у тыя ж тэрміны можа прайсці рэферэндум аб далучэнні Паўднёвай Асеціі. Улады самаабвешчанай рэспублікі запланавалі свой рэферэндум на тую ж тэму 17 ліпеня – аднак два суразмоўцы медыя, блізкія да адміністрацыі прэзідэнта, запэўніваюць, што дата плебісцыту можа памяняцца.
Не выключаюць, што разам з гэтымі рэферэндумамі ў самаабвешчаных рэспубліках Данбасу можа прайсці плебісцыт аб «зліцці» з Расеяй у Беларусі.
Суразмоўца сцвярджае, што менавіта гэтага Пуцін патрабуе ад Лукашэнкі, але апошні пакуль не пагаджаецца. «Але гэта калі атрымаецца прадушыць Лукашэнку, які ад такога сцэнару ўсяляк адыходзіць», – падкрэслівае адзін з суразмоўцаў.
Алена Рувіна, belsat.eu
