Праваабарончы цэнтр «Вясна» паведамляе, што былы намеснік міністра сувязі, памочнік старшыні калегіі Еўразійскай эканамічнай камісіі Дзмітрый Шадко быў вызвалены з-пад варты.
Шадко быў затрыманы ў Маскве 9 сакавіка па справе аб дыверсіі ў Мачулішчах. Чыноўнік – удзельнік руху ралевікоў, і прычынаю цікавасці сілавікоў да яго, паводле непацверджанай версіі, сталася тое, што Шадко асабіста ведае асобаў, падазраваных па гэтай справе. Па інфармацыі медыяў, памочніка Мяскніковіча затрымалі паводле арт. 289 КК – «Тэрарызм».
Цяпер Шадко знаходзіцца на свабодзе. Акалічнасці яго вызвалення з СІЗА КДБ невядомыя.
Паводле праваабаронцаў, таксама на волю выйшлі яшчэ два чалавекі, што былі затрыманыя нібыта з-за датычнасці да дыверсіі ў Мачулішчах – гэта Ілля Кабанаў і Руслан Маслянкоў. Іх затрымалі 4 сакавіка.
Глеб Нержын belsat.eu
