Журналіст «Камсамольскай праўды» даслаў чарговы ліст з-за кратаў. Арыштаваны на пачатку кастрычніка Генадзь Мажэйка адзначае, што апошнім часам, на фоне вайны, ён пачаў пачувацца «закінутым», быццам застаўся «на ўзбочыне жыцця», паведамляе «Press Club Belarus».
Генадзь Мажэйка ўжо больш за паўгода застаецца ў СІЗА. Журналіста абвінавачваюць у парушэнні адразу двух артыкулаў Крымінальнага кодэксу: аб «распальванні сацыяльнай варожасці» (арт. 130 КК РБ) і аб «абразе прадстаўніка ўлады» (арт. 369 КК РБ). Падставай для арышту стаў артыкул, апублікаваны на афіцыйным сайце газеты – kp.by. Матэрыял быў прысвечаны страляніне ў хаце IT-спецыяліста Андрэя Зельцара і гібелі апошняга разам з супрацоўнікам КДБ Дзмітрыем Федасюком.
«Здаецца, я за плотам ужо сто гадоў, хаця фактычна я толькі перазімаваў. Усяму гэтаму не відаць заканчэння – і ад гэтага асабліва сумна. Але нічога, я стараюся бадзёрыцца. Хоць вельмі не хапае навінаў з таго боку. Я гляджу навіны праз тэлевізар, чытаю «СБ», раней выпісаў «Беларусы і рынак».
Апроч адсутнасці інфармацыі, палітвязень скардзіцца на зніжэнне ўзроўню падтрымання. Генадзь Мажэйка звязвае гэта са зменай інфармацыйнай павесткі на карысць вайны ва Украіне.
«Зразумела, з таго боку плоту жыццё мае свой лад, а інфапавестка змянілася ў бок вайны. Спадзяюся, пра мяне не забудуць».
ХЗ belsat.eu
