У пяцімільённай краіне фіксуюць толькі паўсотні выпадкаў каронавірусу на дзень, а з пачатку пандэміі ад COVID-19 там памерлі 52 чалавекі. Але новазеландцы баяцца штаму о-мікрон.
На наступным тыдні прэм’ер-міністарка Новай Зеландыі Джасінда Ардэрн збіралася пабраца шлюбам, але адклала цырымонію, піша «New Zealand Herald».
«Ох, такое жыццё, – з усмешкай сказала яна пытанне пра адчуванне аб перанос вяселля, але працягнула з сур’ёзным тонам. – Я не адрозніваюся ад тысяч іншых новазеландцаў, якія адчулі значна больш разбуральны ўплыў пандэміі».
З панядзелка яна ўводзіць у краіне жорсткія каронавірусныя абмежаванні, але не локдаўн: абавязковае нашэнне масак, абмежаванне на масавыя зборы людзей (да 100 вакцынаваных чалавек у адным месцы). Пры тым школы і бізнесы застануцца адкрытымі, але для наведвання «неабавязковых» установаў будуць патрабаваць вакцынацыйны пашпарт. Межы закрываюць, але дазваляюць унутраны турызм.
Астраўная краіна паспяхова стрымала мінулыя штамы каронавірусу: за ўвесь час там у 25 разоў менш выпадкаў COVID-19 на душу насельніцтва, чым у афіцыйнай беларускай статыстыцы (якую, імаверна, моцна заніжаюць), і ў 63 разы менш смерцяў на душу насельніцтва. 93 % новазеландцаў, старэйшых за 12 гадоў, вакцынаваныя (у Беларусі, паводле афіцыйных звестак, 45 %), а 52 % атрымалі трэцюю «бустэрную» дозу вакцыны.
Ды новазеландцы непакояцца, што штам о-мікрон распаўсюджваецца хутчэй за папярэднія, а ў краіне ўжо зафіксавалі ўсплёск выпадкаў менавіта гэтага штаму.
41-гадовая Джасінда Ардэрн з 2013 года ў стасунках з 45-гадовым тэлевядоўцам Кларкам Гэйфардам. У 2018 годзе ў пары нарадзілася дачка, а ў 2019 годзе яны заручыліся. Прэм’ерка расказвала, што лічыць сябе «самай малазаручанай нявестай», што адказны за вяселле муж і што вяселле мае быць «даволі сціплым».
У іншай краіне пад уладай брытанскай каралевы, у самой Вялікай Брытаніі трывае вялікі палітычны скандал праз парушэнне каронавірусных абмежаванняў: нядаўна выкрылі ўдзел прэм’ера Брытаніі Борыса Джонсана ў вечарыне з алкаголем у траўні 2020 года, калі дзейнічаў жорсткі локдаўн. Не толькі апазіцыя, але нават супартыйцы заклікалі яго пайсці ў адстаўку, ён абмежаваўся выбачэннямі і тлумачэннямі, што лічыў сустрэчу працоўнай.
Тым часам у Беларусі Аляксандр Лукашэнка заяўляе, што двойчы перахварэў на каронавірус. 21 студзеня ён параіў беларусам «не парыцца» адносна каронавірусу, а «міжнародных жулікаў» заклікаў «сканчаць гэтую пандэмію». Толькі паводле афіцыйных беларускіх звестак, ад каронавірусу ў краіне памерлі 5916 чалавек, рэальна ж за першыя паўтара года пандэміі «залішняя смяротнасць» склала 32 тысячы чалавек.
АА belsat.eu
