З моманту расейскага ўварвання ва Украіну мінулі амаль тры месяцы, вайна паступова пераходзіць у зацяжную фазу. Разам з тым украінцы ўсцяж рыхтуюць рэзервы для свайго войска, якія ў далейшым будуць дапамагаць вызваляць краіну ад агрэсара. Журналісты «Белсату» пабачылі, як рыхтуецца добраахвотніцкі батальён «Патрыёт», які неўзабаве адправіцца на вайну.
Адукацыйны інтэнсіў для байцоў батальёну «Патрыёт» ладзяць прафесійныя інструктары. Навучальная праграма раздзеленая на чатыры часткі, згодна з чатырма відамі дзейнасці: наданне першай дамедычнай дапамогі, тактычнае рыхтаванне, стральба і размініраванне тэрыторыяў.
«Мэта гэтай праграмы – навучыць украінскага абаронцу дзеяць ва ўмовах, якія пагражаюць жыццю чалавека. На справе праводзіцца шмат заняткаў, якія рыхтуюць людзей выжываць ва ўмовах вайны. Нашая канкрэтная місія – навучыць дамедычнай падрыхтоўцы ды эвакуацыі. У рэаліях вайны гэта спыненне крыві, стабілізацыя стану чалавека ды іншыя дзеянні, якія могуць быць неабходныя пры раненні», – адзначае інструктар і кіраўнік грамадскай арганізацыі «Украінская служба паратунку» Паўло Дыба.
Разнапланавае навучанне байцоў адпавядае баявым задачам батальёну «Патрыёт».
«Увесь працэс падзелены на пэўныя групы. Гэта інжынерная група, каб байцы маглі праводзіць размініраванне і таксама замініраванне тэрыторыі. Кожны з нас павінен добра валодаць тактыкай і агнявою падрыхтоўкаю, мець баявую зладжанасць. Усе падраздзяленні дзеляцца на пэўныя групы, якія павінны ўзаемадзеяць у пэўных умовах. Трэба вывучаць тактычную медыцыну, якая таксама дае магчымасць выжыць у пэўных умовах пры пэўных раненнях. Кожны салдат мае ведаць, што трэба рабіць пры тых ці іншых раненнях», – адзначае камандзір добраахвотніцкага батальёну з пазыўным Фантом.
Ужо ў хуткім часе байцы фармавання плануюць выехаць у зону баявых дзеянняў, аднак з прычынаў бяспекі не называюць канкрэтных месцаў. Разам з тым батальён «Патрыёт» ужо мае багаты досвед дзейнасці ва ўмовах вайны: Дзікая рота ў складзе батальёну выходзіла зачышчаць тэрыторыі Кіеўскай вобласці, чыніла размініраванні, развозіла гуманітарную дапамогу ў цяжкадаступныя рэгіёны.
Пры гэтым, паводле камандзіра батальёну, «Патрыёт», як і іншыя добраахвотніцкія фармаванні, застаецца фактычна на поўным самазабеспячэнні і не залежыць ад дзяржаўнага падтрымання: «Мы супрацоўнічаем з рознымі фондамі – украінскімі і замежнымі. Мы ўдзячныя ўсім, хто далучаецца і дапамагае нам, пачынаючы з ежы і заканчваючы ўсім неабходным. Усе спецсродкі набываюцца пэўнымі арганізацыямі, таму трэба наладжваць сістэмнае забеспячэнне, бо тэхніка пастаянна ламаецца».
Байцы батальёну ўдзячныя за любую дапамогу «Патрыёту», а таксама будуць радыя бачыць новых добраахвотнікаў, якія захочуць да іх далучыцца.
У ноч на 24 лютага Уладзімір Пуцін абвясціў пачатак вайны (у Расеі яе называюць «спецыяльнаю ваеннай аперацыяй») з мэтаю «дэнацыфікацыі і дэмілітарызацыі» Украіны. Менш як за 3 месяцы, паводле ААН, Украіну пакінулі 6,4 мільёна чалавек.
ВК belsat.eu