Абраная прэзідэнтка Беларусі Святлана Ціханоўская распачала свой трэці візіт у ЗША. Гэты візіт адбываецца на запрашэнне Кангрэсу.
Святлана Ціханоўская з прадстаўнікамі Аб’яднанага пераходнага кабінету Вольгай Гарбуновай, Алінай Коўшык і Валерыем Кавалеўскім цяпер з візітам у Злучаных Штатах Амерыкі.
«У нас запланаваныя сустрэчы ў Дзярждэпартаменце, Кангрэсе, мы сустрэнемся з сенатарамі, амбасадарамі і дыпламатамі еўрапейскіх і амерыканскіх краінаў», – распавяла Святлана Ціханоўская.
Каманда Святланы Ціханоўскай таксама мае намер прыняць удзел у канферэнцыі Каліноўскага ў Вашынгтоне. Гэта першая беларуская канферэнцыя на такім узроўні ў ЗША. Падчас мерапрыемства з палітыкамі будзе абмяркоўвацца палітыка замежных краінаў у дачыненні да нашай краіны.
«Я хачу патлумачыць, што ўвядзенне візавых банаў у дачыненні да беларусаў – гэта контрпрадуктыўна, гэта толькі дапамагае рэжыму. Беларусь патрабуе шмат міжнароднай увагі. А голас беларусаў павінен быць прадстаўлены і пачуты», – заявіла Святлана Ціханоўская.
Абраная лідарка Беларусі таксама запрасіла беларусаў у ЗША на сустрэчы.
Алена Аляксандрава belsat.eu
